Leik- og söngkonan Katrína Halldóra Sigurðardóttir vakti mikla athygli í vikunni þegar hún lýsti því yfir í viðtali í hlaðvarpsþættinum, Morgunbollinn með Elísabetu Gunnars, að Tenerife væri hræðilegur staður sem hún hygðist aldrei aftur heimsækja.

„Algjört ofmat. Þetta er hræðilegasti staður á jörðu. Ég fór til Tenerife um páskana 2022 og ég bíð þess ekki bætur. Þetta er hræðilegasti staður á jörð. Veistu það, ég ætla aldrei aftur að fara þarna.“ Líkti hún eyjunni við Las Vegas þar sem allt væri yfirborðskennt og falskt.

Á samfélagsmiðlum mátti sjá mikla umræðu um yfirlýsingu leikkonunnar og sýndist sitt hverjum. Harðir aðdáendur paradísareyjunnar voru allt að því móðgaðir á meðan aðrir voru hreinlega sammála.

Nú hefur flugfélagið Play stokkið inn í umræðuna og boðið Katrínu Halldóru ókeypis flug á annan áfangastað flugfélagsins með því skilyrði að hún hendi í sambærilega úttekt á staðnum. Þetta kemur fram í færslu á Facebook-síðu félagsins.

„Við hjá PLAY elskum Tenerife eins og svo margir, en skiljum vel að eyjan fagra sé ekki fyrir alla. Þess vegna bjóðum við upp á svo marga aðra skemmtilega og áhugaverða áfangastaði. Til dæmis eyjuna Madeira sem er kölluð Havaí Evrópu, hina undurfögru spænsku borg Valencia, sjarmatröllið Porto í Portúgal og Marrakesh í Marokkó. Ef þú vilt vera nokkuð viss um að hitta engan sem þú þekkir mælum við með króatísku perlunni Pula. Þar er til dæmis útilokað að finna íslenska matseðla á veitingahúsum.

Við viljum endilega úttekt frá Katrínu Halldóru á einhverjum ofangreindra áfangastaða félagsins og bjóðum henni hér með far með rauðu skutlunni fram og til baka! Katrín Halldóra Sigurðardóttir hafðu samband við þjónustuteymi PLAY til að bóka flugið þitt,“ segir í tilkynningunni.

Nú er að sjá hvort leikkonan stökkvi á tilboðið og skipi sér sess sem helsti ferðagagnrýnandi þjóðarinnar