Vilhjálmur, sem var borgarstjóri á árunum 2006 til 2007, nefnir fyrst Álfabakkamálið – græna gímaldið svokallaða – sem mikið hefur verið fjallað um undanfarnar vikur.
„Vandræðagangurinn, mistökin og klúðrið vegna risastórrar iðnaðarskemmu við Álfabakka er með þeim hætti að erfitt er að átta sig á hvernig svona getur gerst í stjórnsýslu borgarinnar og hjá kjörnum fulltrúum. Erfitt er að líka að sjá fyrir sér hvaða lausnir eru í sjónmáli gagnvart íbúum, byggingaraðila og rekstraraðilum. Alveg sama hvaða lausn næst fram mun hún eflaust hafa í för með sér gríðarleg fjárútlát fyrir borgarsjóð,“ segir Vilhjálmur sem vindur sér næst í Grafarvoginn.
Hann segir að nýlega framkomnar hugmyndir borgarstjóra um þéttingu byggðar í Grafarvogi hafi vakið hörð viðbrögð íbúa í þessu gamalgróna hverfi og þeir telji að verið sé að skerða aðgang að útivistar- og grænum svæðum.
„Það er eins og borgaryfirvöld leiti með logandi ljósi að opnum og grænum svæðum, þar sem hægt er að þétta byggð og úthluta lóðum til byggingaraðila,“ segir Vilhjálmur og er ómyrkur í máli.
Því næst nefnir Vilhjálmur Laugardalinn sem hann segir vera frábært svæði fyrir íþróttastarf barna og unglinga, afreksfólk og unglinga.
„Þangað sækja og munu sækja borgarbúar og raunar landsmenn allir til að eiga uppbyggilegar ánægjustundir. Nú er fyrirhugað að ráðast í endurbætur á Laugardalsvelli sem þjóðarleikvangi fyrir knattspyrnu, koma upp þjóðarhöll fyrir inniíþróttir og þjóðarleikvangi fyrir frjálsar íþróttir. Á sama tíma koma upp hugmyndir hjá borgaryfirvöldum um byggingu skóla í miðjum Laugardalnum, þvert á áður framkomnar hugmyndir fyrir tveimur árum. Vandséð er hvernig slíkri byggingu verður fyrir komið á þeim stað sem tillögur liggja fyrir um,“ segir Vilhjálmur og bætir við að íbúar, íþróttafélög, foreldrar og aðrir hagsmunaaðilar hafi greinilega ekki verið hafðir með í ráðum hvað þetta varðar.
„Enda hafa allir aðilar risið upp og mótmælt þessum áformum harðlega og skilað athugasemdum sínum til borgaryfirvalda. Engu að síður virðast borgaryfirvöld ætla sér að keyra þetta mál áfram í óþökk allra,“ segir hann.
Þéttingarstefna er næst á dagskrá í pistli Vilhjálms og segir hann að stefna borgarinnar hafi á liðnum árum komið illa í bakið á borgaryfirvöldum.
„Íbúar gera sér góða grein fyrir því að útsýni, birta, sólarljós og gæði umhverfis skipta miklu máli og augljóslega meira máli en borgaryfirvöld gera sér grein fyrir. Nýlegt dæmi um þetta eru breytingar á skipulagi við Hringbraut og Hlíðarenda, þar sem íbúar vakna upp við vondan draum og telja að framkomnar hugmyndir muni skerða lífsgæði þeirra. Það er mikilvægt að þétting byggðar taki mið af sjónarmiðum og hagsmunum íbúa,“ segir borgarstjórinn fyrrverandi.
Hann nefnir að lokum Öskjuhlíðina og vísar í nýlegar fréttir þess efnis að loka þurfi einni flugbraut flugvallarins. Segir hann að borgaryfirvöld treysti sér ekki til þess að verða við ábendingum um aðgerðir til að tryggja flugöryggi á flugvellinum og því sé þetta niðurstaðan.
„Borgaryfirvöldum virðist vera einkar lagið þessa dagana að fá íbúa borgarinnar, um alla borg, upp á móti sér, hafa lítið samráð við hagsmunaaðila, nýta sér ekki ábendingar íbúa og endurgjöf til íbúa er lítil sem engin. Samstarf og samtal við borgarbúa er nauðsynlegt til að blómlegt mannlíf geti þróast í borgarsamfélaginu með eðlilegum hætti til framtíðar,“ segir Vilhjálmur að lokum.
