Manchester United mun ekki lenda í vandræðum fyrir færslu sem félagið birti eftir sigur á Arsenal í vítaspyrnukeppni í enska bikarnum í gær.
Eftir rólegan og markalausan fyrri hálfleik lifnaði leikurinn við í þeim seinni. Bruno Fernandes kom United yfir og skömmu síðar fékk Diogo Dalot sitt annað gula spjald og þar með rautt.
Gabriel jafnaði fyrir Arsenal áður en Skytturnar fengu svo umdeilt víti þegar Kai Havertz fór niður í teignum eftir samstuð við Harry Maguire. Martin Ödeggard fór á punktinn en klikkaði. Meira var ekki skorað og United vann svo leikinn í vítaspyrnukeppni.
Vítaspyrnudómurinn í leiknum sat greinilega enn í þeim sem stýrir aðgangi United á X því þar stóð einfaldlega: „Réttlæti“ eftir leik. Hefur þetta vakið mikla athygli og umræða skapast um hvort United fengi sekt vegna færslunnar.
Martyn Ziegler, blaðamaður Times, segir hins vegar að enska knattspyrnusambandið muni ekkert aðhafast í málinu.
