Bruno Fernandes, leikmaður Manchester United, trúði varla eigin augum og eyrum er hann horfði á leik liðsins gegn Newcastle nýlega.

Joshua Zirkzee, liðsfélagi Fernandes, fékk mikið skítkast í þessum leik fyrir sína frammistöðu og var tekinn af velli eftir 33 mínútur.

Fernandes var í banni í þessum leik og heyrði það sem öskrað var á Zirkzee sem er ungur Hollendingur og kom til félagsins í sumar.

Fyrirliðinn vorkennir liðsfélaga sínum mikið en talið er að hann hafi farið beint inn í klefa og grátið eftir áreiti frá stuðningsmönnum United.

,,Ég var í stúkunni og ég hef aldrei uppölifað annað eins,“ sagði Fernandes í samtali við TalkSport.

,,Þetta pirrar mig svo mikið því hann er leikmaður sem leggur sig mikið fram. Hann kemur í deildina úr annarri deild og þarf tíma til að aðlagast, hann er með mikil gæði.“

,,Hann hefur ekki sýnt öll þessi gæði hingað til en til að byrja með talaði fólk um einn besta framherjann og svo hefur enginn trú á honum lengur.“

,,Við höfum trú á honum. Ég hefði frekar viljað lenda í þessu en að liðsfélagi minn þurfi að vera í þessari stöðu.“