Netglæpamenn hafa notað myndir af séra Jóhönnu Magnúsdóttur, sóknarpresti í Víkurprestakalli, til að reyna að svindla á fólki. Í fölsuðum auglýsingum á samfélagsmiðlum er boðinn ókeypis tjaldvagn til að reyna að narra fólk.
Staðarmiðillinn Sunnlenska.is fjallar um málið en Jóhanna greindi einnig frá svindlinu á sinni samfélagsmiðlasíðu.
Í auglýsingu, þar sem notuð er mynd af Jóhönnu en reyndar titluð Jóhanna Stefánsdóttir, á Sölutorgi Norðurlands á Facebook er vagninn boðinn. Segir þar að hjón vilji gefa tjaldvagn til fjölskyldu sem geti séð vel um hann. Sagt er að hjónin hafi flutt til Portúgal vegna verkefnis og að húsbíllinn nýtist þeim ekki lengur. Þá er gefið upp tölvupóstfang sem áhugasamir eigi að senda á.
Þetta er alls ekki rétt og séra Jóhanna er ekki að gefa neinn tjaldvagn. Hún tilkynnti málið til Facebook sem rannsakaði málið og svaraði henni á þá leið að þetta væri vissulega ólögleg síða. Síðan, sem var búin að vera í notkun í áratug eða síðan árið 2015, var tekin niður.
„Þessi meinta Jóhanna Stefánsdóttir sem er að pósta inn á alls konar grúppur og sem notar mína mynd – er svindlari. Vonandi er engin/n að falla fyrir þessu,“ sagði hún í færslu á Facebook og bað fólk að tilkynna ef það sæi þetta einhvers staðar.
Hún segir að þessir óprúttnu aðilar sem þykjast vera hún hafi verið að reyna að „gefa tjaldvagninn“ í þó nokkurn tíma. Einnig að einhverjir hafi bitið á öngulinn og sent þeim póst. En svindlið gangi væntanlega út á að viðkomandi gefi upp upplýsingar eða eigi að borga eitthvað.
„Það er svolítið fúlt að geta ekki treyst fólki og þurfa að vera á varðbergi á hvaða hlekk maður ýtir – hverja maður samþykkir sem vini á facebook – hvaða símtölum er svarað o.s.frv.,“ segir Jóhanna í færslu. „Mikið af mínu fólki hefur lent í svindli – margir berskjaldaðir vinir líka sem eru grunlaus um að eitthvað illt liggi á bak við t.d. beiðni um símanúmer. Hver hefur ekki fengið svoleiðis frá „vinum“ ?“
Segir hún að nýlega hafi verið hringt úr númeri Facebook-vinkonu en það var ekki vinkonan sem hringdi heldur aðili sem sagði að Jóhanna ætti inneign í bitcoin.
„Ég auðvitað sagði viðkomandi til syndanna. Bendi fólkinu oft á karmalögmálið,“ segir hún. „Sko ef maður svindlar eða lýgur þá kemur það til baka til manns!!“
