Samkvæmt fréttum taívanskra fjölmiðla þá var stór sæstrengur, nærri stórri iðnaðarhöfn á eyjunni, skemmdur á föstudaginn. Taipei Times segir að kínverskt skip hafi skemmt strenginn og hefur þetta eftir taívönsku strandgæslunni og símafyrirtækinu Chunghwa Telecom sem rekur strenginn.

Símafyrirtækið segir að varaleið sé til staðar og því muni þetta ekki hafa mikil áhrif á fjarskipti á eyjunni.

Skipið, sem grunur leikur á að hafi skemmt strenginn, heitir Shunxin-39. Strengurinn fór í sundur um 13 kílómetra norðan við borgina Yehliu.

Þetta er ekki í fyrsta sinn sem grunur fellur á Kínverja vegna skemmdarverka sem beinast að Taívan.

Kínverjar telja eyjuna vera hluta af Kína en lýðræðisríkið Taívan er annarrar skoðunar og heldur fast í sjálfstæði sitt og hefur engan áhuga á að lenda undir járnhæl kommúnistastjórnarinnar í Peking.