Alls var um 519 milljónum króna úthlutað úr sjóðnum. Handknattleikssambandið fékk langhæsta styrkinn eða rúmar 70 milljónir. Þetta var tekið fyrir í Þungavigtinni fyrir helgi.
„Til hvers er KSÍ í ÍSÍ? Ég myndi bara hætta í þessu ÍSÍ drasli og segja þeim að éta það sem úti frýs. Þetta er bara djók,“ sagði Kristján Óli Sigurðsson, sem er ekki þekktur fyrir að liggja á sínum skoðunum.
„Af hverju eiga til dæmis yngri landslið KSÍ ekki að fá styrki eins og önnur sambönd? Þetta er bara kjaftæði. Hin samböndin geta bara rekið sig eins og þeim sýnist. Handboltalandsliðið er í nýrri keppnistreyju en hún var ekki sett í sölu fyrir jólin. Það hefði verið hægt að selja nokkrar treyjur en þeir fá bara alltaf sínar 70 milljónir og allir virkilega glaðir. Ef ég væri KSÍ myndi ég gjöra svo vel og segja mig úr ÍSÍ.“
Varðandi umsókn KSÍ í afrekssjóð segir ÍSÍ eftirfarandi á vef sínum:
„Knattspyrnusamband Íslands (KSÍ) sendi inn umsókn til Afrekssjóðs ÍSÍ vegna verkefna ársins 2025. Þrátt fyrir að KSÍ sé flokkað sem afrekssérsamband ÍSÍ og fer þar fremst í flokki á mörgum sviðum fær sambandið ekki styrk við þessa úthlutun. Er þar, líkt og síðustu ár, horft til fjárhagslegrar stöðu sérsambandsins og vísað til heimilda sem eru í reglugerð sjóðsins varðandi slíka ákvörðunartöku.“
Þorvaldur Örlygsson, formaður KSÍ, ræddi málið í samtali við Stöð 2/Vísi um helgina.
„Fyrst og fremst eru þetta mikil vonbrigði. Ég ætla nú samt að taka það fram að ég fagna því fyrir hönd hinna sérsambandanna að þau séu að fá fé. Auknar tekjur fyrir þau og ég gleðst fyrir þeirra hönd og fyrir þau að fá fjármagn inn en fyrir okkur er þetta ekki gott. Við teljum okkur eiga rétt á að fá inn fé úr þessum afreksjóði en því miður erum við enn og aftur ekki að fá úthlutun. Höfum ekki fengið síðan árið 2017.
Það segir sig sjálft að það yrði mjög gott að hluta af þessari úthlutun inn í reksturinn og hreyfinguna. Við gætum þá gert fleiri hluti. Við höfum þurft að skera svolítið niður hjá okkur á þessu ári en höfum verið með mjög ábyrgan rekstur undanfarið ár. Við verðum að átta okkur á því að knattspyrnuhreyfingin er stærsta hreyfingin innan vébanda ÍSÍ. Hún er stór og innan ÍSÍ erum við með ansi marga iðkendur. Við erum í rauninni bara að biðja um smá sanngirni. Að það sé horft til þess að við erum stór fjöldahreyfing. Við erum hvað svekktastir með það. Við viljum að það sé sanngirni í þessu. Að það sé horft fram veginn og séð hvað við erum að gera. Það er úthlutað til allra, enn og aftur þá fagna ég fyrir hönd hinna, en við viljum fá hluta af þessu líka,“ sagði hann þar meðal annars.
