Joe Biden, fráfarandi forseti Bandaríkjanna, er fullur eftirsjár yfir því að hafa látið undan þrýstingi flokkfélaga sinna í Demókrataflokknum og hætt við framboð sitt til endurkjörs. Þetta er fullyrt í umfjöllun Washington Post um helgina. Biden henti inn hvíta handklæðinu eftir afleitar kappræður gegn Trump síðasta sumar þar sem hann virtist ekki ganga alveg heill til skógar en nú eftir að rykið er að falla til jarðar eftir kosningarnar er Biden, sem er 82 ára gamall, sagður fullviss um að hann hefði getað unnið sigur á Trump í forsetakosningunum. Eins og alþjóð veit hafði varaforseti Biden, Kamala Harris, ekki erindi sem erfiði í þá glímu.
Á móti eru margir Demókratar á því að barátta Harris hafi tapast því að Biden dró lappirnar með að draga framboð sitt tilbaka. Vilja einhverjar raddir innan Demókrataflokksins meina að Biden hafi ýjað að því að hann yrði aðeins forseti í eitt kjörtímabil og myndi síðan afhenda keflið til fulltrúa yngri kynslóða. Það hafi því verið ákveðin svik að hann skyldi íhuga að berjast fyrir endurkjöri.
Ljóst er að Demókratar eru í talsverði krísu eftir sigur Trump og innan flokksins er verið að reyna að finna útskýringar á því hvernig kosningarnar töpuðu. Biden og aðilar nærri honum hafa viðurkennt ýmis mistök sem gerð voru á forsetatíð hans. Meðal annars hafi stjórnunarstíll forsetans verið full gamaldags og þá hafi hann og ríkisstjórn hans mátt standa sig betur í að stappa stálinu í þjóð sína á meðan Covid-faraldurinn gekk yfir.
