Spákonan Ellý Ármannsdóttir er gestur vikunnar í Fókus, spjallþætti DV. Um er að ræða sérstakan áramótaþátt þar sem Ellý spáir fyrir mörgum þekktum andlitum sem voru til umræðu á nýliðinu ári. Til að mynda fyrrverandi forsetahjónunum, Guðna Th. Jóhannessyni og Elizu Reid, blaðamanninnum Þórði Snæ Júlíussyni, fyrrverandi forsætisráðherranum Katrínu Jakobsdóttur, fjölskyldunni á bak við World Class-veldið og áhrifavaldaparinu Línu Birgittu og Gumma Kíró.
Hún spáir fyrir fleiri þjóðþekktum Íslendingum en þáttinn má horfa á í heild sinni hér að neðan eða hlusta á Spotify og öllum helstu hlaðvarpsveitum.
Það er gaman að segja frá því að Ellý spáði fyrir falli ríkisstjórnarinnar og uppgangi Kristrúnar Frostadóttur í síðasta áramótaþætti Fókuss.
Sjá einnig: Ellý Ármanns spáði fyrir falli ríkisstjórnarinnar og uppgangi Kristrúnar fyrir ári síðan – Sjáðu myndbandið
„Það er ótrúlega gaman að sjá þetta rætast núna því þegar maður er spákona fær maður ekki endilega tíma. Ég fæ ekki mánuði, því við erum í svo miklu tímaleysi. Stundum er maður að einblína á eitthvað sem gerist núna, en svo gerist það kannski ekki fyrr en á næsta ári. Þannig gaman að sjá þetta rætast,“ segir Ellý.
Ellý lítur hlýjum augum yfir liðið ár. Aðspurð hvað hafi staðið upp úr hjá henni segir hún:
„Fjölskyldan mín, það eru allir vinir og öllum líður vel. Ég vakna á daginn og ég geri bara það sem mér finnst gaman, ég geri aldrei það sem mér finnst leiðinlegt. Það er bara mitt mottó. Það er eins og það gangi allt upp. Ég er enn flugfreyja hjá Icelandair, ótrúlega gaman, svo er ég líka að mála og kenna hjá Kötlu fitness, en spákonan er einhvernveginn orðin að mínu starfi.“
Ellý segist ætla að halda áfram því sem hún er að gera á meðan eftirspurnin er til staðar. „Á meðan einhver vill mína þjónustu ætla ég að leggja mig fram að gera eins og ég get,“ segir hún.
Um helgina mynduðu formenn Samfylkingarinnar, Viðreisnar og Flokks fólksins ríkisstjórn sem hefur fengið viðurnefnið Valkyrjustjórnin.
Við spurðum Ellý: Hvernig mun stjórnarsamstarf þeirra ganga?
„Mjög vel. Það er gríðarlegur styrkur en það eru líka einhverjar áhyggjur. Það er eins og einhver málaflokkur hjá þeim fái ekki nóg, fjármagn, tekjur, peningar. Það er verið að deila einhverju niður, en það er gríðarlegur styrkur hérna.
Þetta eru eins og þrjár, ekki valkyrjur heldur ljónynjur. Þær horfa fram á við og þær vita að breytingar eru erfiðar, annars væru það ekki breytingar. Það eru einhverjar áhyggjur varðandi fjármagn en það leysist allt saman. Þetta á allt eftir að ganga vel.
Við sjáum að sú sem hefur valdið og þau sem hafa valdið, sýna hvaða karakter þau hafa að geyma. Gefðu fólki vald þá sérðu hvaða mann það hefur að geyma. Þá fáum við sjá það.“
Ellý segir að það sé ekki bara neikvætt heldur líka jákvætt. „Þetta er mjög spennandi að fylgjast með þessu, en þær eru ekki eins og ljónynjur sem standa uppi á kletti og biðja almúgann að klappa fyrir sér. Þær eru meira á sléttunni, hjá okkur hinum í jafningja- og kærleiksorku. Leiðtogar en ekki einhverjir yfirmenn.
Það er einhvern veginn allt uppi á yfirborðinu og það er svo gaman að sjá þetta og verður gaman að fylgjast með þessu. En munum að breytingar eru alltaf erfiðar, annars væru það ekki breytingar.“
Horfðu á þáttinn með Ellý hér að ofan eða hlustaðu á Spotify.
