Kennari, kona, sem starfar í grunnskóla í Hafnarfirði hefur verið fundin sek um ólögmæta nauðung og barnaverndarbrot gegn dreng sem gerði dyraat á heimili hennar. Greip hún meðal annars um hönd hans og ýtti upp að vegg.
Móðir drengsins kærði konuna þann 16. júní árið 2020 fyrir líkamsárás og barnaverndarbrot á syni hennar.
Atvik málsins voru þau að drengurinn var ásamt vini sínum á leikvelli sem er umkringdur íbúðum að leika sér með frisbídisk. Diskurinn lenti ofan á þaki á skúr í garði heimilis kennarans og fóru þeir og sóttu diskinn. Þá ákvað drengurinn að gera dyraat hjá kennaranum, en hinn beið, og fóru strákarnir svo út á völlinn aftur til að spila fótbolta.
Kennarinn kom þá askvaðandi út á leikvöllinn og drengirnir földu sig. Sá sem gerði dyraatið faldi sig við girðingu við garðinn en það dugði þó ekki til. Kennarinn sá hann, greip í úlnlið hans og dró hann með fram lóðinni.
Drengurinn öskraði og bað kennarann að sleppa sér. Þá kom vinurinn og ætlaði að hjálpa honum en varð hræddur og flúði heim til móður sinnar þegar kennarinn sagði honum að koma. Móðir vinarins, sem var ekki langt frá, heyrði öskrin í drengnum sem kennarinn var að draga þó nokkra vegalengd.
Drengurinn reyndi að streitast á móti þegar kennarinn dró hann, frá hliðinu á leikvellinum að útidyratröppunum og upp þær. Ýtti hún honum upp að húsveggnum heima hjá sér og fékk hann við það mar á herðablaðið.
Á þessum tímapunkti kom móðir vinarins að og lýsti hún atvikum þannig að kennarinn hefði verið mjög reið og öskrað að sonur hennar hefði líka gert eitthvað. Hann þrætti fyrir það en kennarinn sagði hann ljúga og sagðist eiga myndbandsupptökur af atvikinu.
Eftir þetta fór móðir vinarins með drengina tvo heim til sín og grét sá sem kennarinn greip mikið. Var honum bersýnilega mjög brugðið. Hélt hann að kennarinn ætlaði að draga hann inn til sín og var hann logandi hræddur við það.
Móðir drengsins hitti kennarann skömmu eftir þetta og spurði hana hvort hún hefði veist að syni hennar. Neitaði hún því og sagði drengina hafa verið að gera dyraat hjá sér. Spurði kennarinn móðurina hvort hún tryði fullorðnum einstaklingi eða barni. Sagðist hún eiga myndbandsupptökur af þessu en þegar móðirin bað um að fá að sjá þær dró kennarinn það til baka.
Móðirin fór með drenginn á Læknavaktina og var hann með skrámur á herðablaði og hnúa vinstri handar. Tekið var viðtal við báða drengina í Barnahúsi um haustið þar sem þeir lýstu atvikinu út frá sinni hlið.
Lögreglustjórinn á höfuðborgarsvæðinu ákvað að hætta rannsókn málsins þann 8. desember þar sem hann taldi ekki grundvöll til að halda henni áfram. Sú ákvörðun var hins vegar kærð til Ríkissaksóknara sem felldi hana úr gildi 8. apríl 2021.
Kennarinn var sakfelldur í Héraðsdómi Reykjavíkur þann 20. desember. Ákvörðun refsingar var hins vegar frestað haldi kennarinn skilorð í tvö ár. Þarf hún að greiða drengnum 400 þúsund krónur í bætur auk málskostnað upp á rúmar 2 milljónir króna.
