Óhætt er að segja að umgengni um svæðið í kringum Leifsstöð mætti vera betra. Í dag voru birtar myndir á samfélagsmiðlum sem sýna slæma umgengni og uppsafnað rusl við flugstöðina, sem er það fyrsta sem erlendir gestir sjá við komuna til landsins.

„Þeir taka þetta til sín sem eiga þessi ílát,“ segir starfsmaður ferðaþjónustufyrirtækis sem birti myndirnar á samfélagsmiðlum í dag. Beinir hann orðum sínum til ISAVIA sem rekur Flugstöð Leifs Eiríkssonar. „Það hlýtur að vera sjokk fyrir gestina okkar að sjá svona svo dögum skiptir þessar myndir voru teknar í dag 21 des . Ísavia gerið betur en þetta.“

Á myndunum má sjá yfirflæðandi ruslatunnur og sígarettu stubba flæðandi um gangstéttina. Sem og burðarkerru með papparusli og rusla poka á víð og dreif.

Þetta er ekki í fyrsta skipti sem sóðaskapur við flugstöðina er til umræðu eða kemst í fjölmiðla. Sumarið 2023 fjallaði Vísir um að rútubílstjórar við flugstöðina teldu umhirðuna ekki nógu góða. Sjaldan væri þrifið og aðgengi að ruslatunnum væri slæmt. Voru þá einnig birtar ljósmyndir sem sýndu rusl flæðandi út um allt fyrir utan Leifsstöð, gáma og tunnur sem annað hvort voru of lítil eða ekki tæmd nógu oft.