Það eru fáir með jafn kröfuharðann yfirmann og lið Sloboda Tuzla sem spilar í efstu deildinni í Bosníu og er í miklum vandræðum eftir 17 leiki.

Sloboda hefur ekki unnið leik á öllu tímabilinu og er í botnsæti deildarinnar með aðeins tvö stig.

Gengið hefur svo sannarlega verið ömurlegt en liðið hefur gert tvö jafntefli og tapað 15 ásamt því að skora aðeins fimm mörk og fá á sig 36.

Það eru heil 19 stig í öruggt sæti í deildinni og hefur eigandi félagsins því ákveðið að taka málin í sínar hendur.

Azmir Husic, eigandi liðsins, hefur ákveðið að reka alla leikmenn Sloboda sem og þjálfara liðsins og vill endurbyggja á næstu vikum og mánuðum.

Vetrarfríið ef farið af stað í Bosníu en næsti leikur Sloboda er um miðjan febrúar og er því nægur tími til stefnu.

Það eru enn 16 leikir eftir í deildarkeppninni og er Huzic sjálfur vongóður að með réttum leikmönnum geti félagið haldið sér uppi í efstu deild.

Til að bæta gráu ofan á svart þá er félagið í töluverðum fjárhagsvandræðum en Huzic virðist sjálfur vera vongóður varðandi framhaldið.

,,Þetta var einn erfiðasti dagurinn í mínu lífi. Ég þurfti að tjá öllum leikmönnum að þeir væru ekki lengur hluti af félaginu,“ sagði Huzic.

,,Við höfum nú þegar látið alla leikmennina fara og ég er búinn að ræða við Nalic þjálfara og okkar samstarfi er lokið.“

,,Ég er þó sannfærður um að við getum fengið inn betra lið en það sem við vorum með í höndunum sem hefur fengið tvö stig hingað til.“