Lögreglan á höfuðborgarsvæðinu var kölluð út í gærkvöldi eftir að ferðamaður varð fyrir líkamsárás. Ekki kemur fram hvar árásin átti sér stað að öðru leyti en því að hún varð í umdæmi lögreglustöðvar 1 sem sinnir meðal annars miðbænum.

Að sögn lögreglu var gerandi handtekinn skammt frá vettvangi og vistaður í fangaklefa í þágu rannsóknar málsins.

Alls gista tveir í fangaklefa og eru 56 mál bókuð í kerfum lögreglu á tímabilinu frá klukkan 17 í gær til klukkan fimm í morgun.

Tvö þjófnaðarmál í verslunum komu til kasta lögreglu og voru bæði málin leyst á vettvangi. Þá var einn ökumaður stöðvaður í akstri vegna gruns um akstur undir áhrifum áfengis. Var hann látinn laus eftir hefðbundið ferli.