Í frétt AP kemur fram að Xaver hafi sýnt lítil viðbrögð þegar dauðadómurinn var kveðinn upp. Réttarhöldin yfir Xaver stóðu yfir í nokkrar vikur og vildu níu kviðdómendur að hann yrði dæmdur til dauða en þrír voru því mótfallnir.
Morðin voru sérlega hrottafengin en fórnarlömbin, einn viðskiptavinur og þrír starfsmenn, voru á aldrinum 31 til 65 ára. Skipaði hann þeim að leggjast á grúfu á gólfið áður en hann gekk á milli þeirra og skaut þær í höfuðið.
Ein af fórnarlömbunum var Marisol Lopez, 55 ára starfsmaður útibúsins, og kom dóttir hennar fyrir dóminn þar sem hún lýsti afleiðingum morðsins á hana og fjölskyldu hennar.
Benti hún á að Marisol hefði tekið brosandi á móti Xaver þegar hann kom inn í bankann þennan dag. „Þú braust hjarta mitt í milljón mola. Ég mun fagna daginn sem þú deyrð, hvenær sem það verður. Þú verður alltaf morðingi, heigull og sóun á lífi,“ sagði hún.
Zephen hafði glímt við geðræn veikindi áður en hann lét til skarar skríða en þrátt fyrir það var hann metinn sakhæfur. Hann sendi kærustu sinni skilaboð um morguninn þar sem hann tjáði henni að hann myndi deyja þennan dag. Sagðist hann vilja drepa fólk til að athuga hvernig það væri.
Einn starfsmaður útibúsins komst lífs af en henni tókst að flýja út um bakdyr þegar hún heyrði skothvellina.
