Maðurinn sem er sakaður um að hafa banað forstjóra tryggingafélagsins UnitedHealthcare hefur verið ákærður fyrir morð. Ekki nóg með það heldur segir ákæruvaldið að morðið sé hryðjuverk.

Héraðssaksóknari Manhattan, Alvin Bragg, segir að morðið á forstjóranum Brian Thompson hafi verið „morð sem var ætlað að valda skelfingu og við höfum séð slík viðbrögð“. Bragg sagði á blaðamannafundi í dag:

„Þetta var skelfilegt, úthugsað og markvisst morð sem var ætlað að valda sjokki, vekja athygli og ógna. Þetta átti sér stað á einu líflegasta svæði borgar okkar, ógnaði öryggi íbúa og ferðamanna, notenda samgöngukerfisins og viðskiptafólks sem var á leið í vinnu.“

Morðið hefur vakið mikla reiði í garð einkarekna sjúkratryggingakerfisins í Bandaríkjunum. Margir fagna ódæðinu og líta á meinta morðingjann, Luigi Mangione, sem byltingarhetju. Lögregla hefur varað auðmenn og aðra forstjóra við því að þeir gætu verið í hættu. Kona var handtekin á dögunum og ákærð fyrir hótanir eftir að hún vitnaði í Mangione í símtali við tryggingafulltrúa sem neitaði greiðslukröfu hennar. Hún vísaði til orðanna deny, depose og defend sem voru rituð á skothylki sem fundust á vettvangi morðsins. Við þetta bætti hún – Þið eruð næst. Konan var sökuð um að hafa hótað hryðjuverki eða fjöldamorði með þessum orðum.

Mál konunnar hefur eins vakið reiði þar sem margir telja að kerfið sé nú að reyna að kæfa alla gagnrýni í garð tryggingafélaganna. Nú eigi að vernda auðmennina og enginn almennur borgari geti reiknað með viðlíka aðstoð lögreglu, dómkerfis og stjórnmálamanna þegar einhver nákominn þeim er myrtur um hábjartan dag.

Samkvæmt sláandi könnun, sem PoliticsVideoChannel lét gera á dögunum, myndu 60 prósent íbúa í New York sýkna Mangione ef þeir fengju sæti í kviðdómi.