Þetta kemur fram í fundargerð frá fundi bæjarráðs síðastliðinn miðvikudag. ÍBV hafði farið fram á 20 milljóna króna aukafjárveitingu.
„Það er mat ÍBV og annara fagaðila að nauðsynlegt sé að koma hitalögnum undir völlinn sem síðar verða nýttar í upphitun vallarins, en ekki er gert ráð fyrir hitalögnum í
útboðsgögnum Vestmananeyjabæjar. Ef setja á hitalagnir undir völlinn þarf það að gerast áður en jöfnunarlag og grasmottan eru sett niður og liggur það fyrir að töluvert hagræði er fyrir Vestmannaeyjabæ að gera það núna frekar en síðar.
Með því að hafa hitalagnir klárar undir vellinum frá upphafi gefst einnig tími til að leita að leiðum til að hita hann upp og finna leiðir til að halda rekstrarkostnaði í lágmarki við að halda vellinum frostfríum. Í Vestmananeyjum er engin reynsla af nýtingu gervigrasvallar utandyra og því mikilvægt að hitalagnir séu til staðar ef nýting vallarins verður ekki eins og bæjaryfirvöld leggja upp með,“ sagði meðal annars í erindi ÍBV.
Bæjarráð fundaði með forsvarsmönnum ÍBV þann 4. desember þar sem menn báru saman bækur sínar. „Samkvæmt meðfylgjandi minnisblaði er heildarkostnaður við hitalagnir sem tengjast inn á kerfi HS Veitna áætlaður 85 m.kr. og að auki er árlegur rekstrarkostnaður áætlaður 60 m.kr. Heildarkostnaður við hitalagnir sem yrðu tengdar varmadælu er áætlaður 265 m.kr. og árlegur rekstrarkostnaður um 30 m.kr,“ segir í fundargerðinni.
Vegna mikils kostnaðar við hitalagnir og rekstur á þeim sá bæjarráð ekki ástæðu til að breyta áætlunum varðandi gervigras á Hásteinsvöll og beiðni ÍBV þar með hafnað.
„Markmiðið með framkvæmdinni er að lengja tímabilið og auka nýtingu vallarins hvern dag svo fleiri iðkendur geti æft og keppt á honum stóran hluta ársins. Samkvæmt fyrirliggjandi minnisblaði verður ekki annað séð en að það markmið náist. Gervigras og flóðlýsing á Hásteinsvöll mun stórbæta aðstöðu til knattspyrnuiðkunar í Vestmannaeyjum. Á árunum 2024-2026 er gert ráð fyrir 280 m.kr. m.v. verðlag þessa árs í framkvæmdina,“ segir meðal annars í niðurstöðu bæjarráðs.
