Suður-kóreska þingið hefur ákveðið að ákæra forseta landsins, Yoon Suk Yeol, fyrir afglöp í starfi Þetta var niðurstaða kosningar í þinginu í dag en 204 þingmenn af 300 á þinginu kusu með tillögunni. 85 voru á móti en þrír þingmenn greiddu ekki atkvæði og átta voru ógild.
Ákæran kemur í kjölfar misheppnaðar tilraunar Yoon til þess að lýsa yfir herlögum í landinu þann 3. desember síðastliðinn. Yoon tók þá ákvörðun eftir átök á þinginu vegna fjárlagafrumvarps meirihlutans í landinu. Tilkynningin um herlögin féll í grýttan jarðveg og mótmælaalda og órói fylgdi í kjölfarið. Þingmenn brutust inn í þinghúsið til þess að greiða atkvæði um ályktun þess efnis að herlögin yrðu afnumin og sex klukkustundum síðar dró Yoon forseti ákvörðunina tilbaka. Þar með var staða hans orðin afar veik.
Síðustu ellefu dagar hafa verið róstursamir í Asíuríkinu en meirihluti landsmanna var afar ósáttur við ákvörðun Yoon, sem er þrettándi forsetinn í sögu Suður-Kóreu. Ákvörðun þingsins um að ákæra hann var til þess að mótmælendur fögnuðu margir ákaft fyrir framan þinghúsið.
Ákvörðun þingsins hefur þær afleiðingar að Yoon mun sjálfkrafa fara í leyfi frá störfum og forsætisráðherrann Han Duck-soo mun framfylgja skyldum embættisins. Stjórnlagadómstóll hefur nú 180 daga til að fara yfir málið og meta hvort að brottvikning Yoon verði staðfest. Verði það raunin munu Suður-Kóreumenn þurfa að kjósa nýjan forseta innan 60 daga frá ákvörðun dómstólsins.
