Grindvíkingar hentu 593 tonnum á móttökustöð Kölku í Grindavík á tímabilinu maí til september árið 2024. Það er aukning um 327 tonn miðað við sama tímabil árið 2023. 

Þetta kemur fram í nýjum gögnum frá Kölku um sorphirðu á svæðinu, eins og segir á vef bæjarins.

Sorplosunina í sumar má að stórum hluta rekja til þess að margir Grindvíkingar neyddust til þess að tæma hús sín í tengslum við afhendingu þeirra til fasteignafélagsins Þórkötlu, sem gerði kröfu um að húsin yrðu afhent tóm og þrifin. 

Um miðjan nóvember var íbúum gert kleift að gera hollvinasamninga við fasteignafélagið. Með því að gera hollvinasamning ákveður „hollvinur” að leigja aðgang að húsinu sem félagið hefur keypt af þeim. Hollvinur hefur þá heimild til þess að nota húsið innan þeirra marka sem koma fram í samningnum en meðal þess er heimild til að geyma lausafé í eigninni og sinna viðhaldi og umhirðu eftir hentugleika. 

Sjá einnig: Grindvíkingar eiga nú kost á takmörkuðum afnotum af húsum sínum í bænum

Mikill munur var á tilteknum flokkum sorps. Aukning í heimilissorpi var um 118 tonn, lituðu timbri um 100 tonn, málmum um 50 tonn, húsgögnum um tæp 26 tonn og hreinu timbri um 25 tonn.

Alls hentu Grindvíkingar 187 tonnum af hreinu timbri, 186 tonnum af heimilissorpi, 89 tonnum af málmum og 41 tonni af húsgögnum á tímabilinu. Þá fóru 18 tonn af raftækjum í ruslið.