Eftir fundinn ræddi Trump við fjölmiðla og nefndi svolítið sem breska hirðin talar næstum ekki um. Hafa sumir velt því fyrir sér hvort Trump hafi talað af sér.
The Washington Post segir að ummæli hans hafi vakið mikla athygli í Bretlandi en það sem hann ræddi um er heilsufar Karls konungs en hann greindist með krabbamein fyrr á árinu. Það sama á við um tengdadóttur hans, Katrínu prinsessu.
Hirðin hefur ekki skýrt nánar frá veikindum þeirra en Trump tjáði sig hins vegar um það sem fram kom í samtali hans við Vilhjálm um veikindi föður hans og eiginkonu.
„Ég átti frábært samtal við prinsinn. Ég spurði hann um heilsu eiginkonu hans og hann sagði að hún hefði það gott. Ég spurði hann um föður hans en hann berst af miklum krafti og hann elskar föður sinn og hann elskar konuna sína, svo þetta var sorglegt,“ sagði Trump í samtali við New York Post.
Vilhjálmur kom örlítið inn á veikindin í viðtali sem hann veitti fyrir um mánuði. Þá sagðist hann vera mjög stoltur af föður sínum og eiginkonu, því þau hafi tekist á við veikindi sín. Hann sagði jafnframt að út frá persónulegu sjónarhorni væri þetta búið að vera mjög erfitt.
