Alræmdir, illa uppaldir drápshundar í Langholtshverfi virðast enn á ný hafa látið til skarar skríða gegn köttum í hverfinu, ef marka má umræður í íbúahópi hverfisins á Facebook.

„Þessir hundar voru að drepa kött kærastans míns! Hringdu á lögguna strax,“ segir kona í ummælum undir færslu í hópnum þar sem birt er mynd af einum hundanna, en þeir eru þrír saman í heimili.

Önnur kona segir undir færslunni:

„Það var rétt í þessu laus hundur í Efstasundi og hann drap köttinn okkar. Veit einhver hver á þennan hund eða hunda? Kötturinn reyndi að komast inn í gegnum lúguna, komst ekki.“

Hundarnir eru sagðir vera af tegudinni Weimaraner. Þeir hafa áður komið við sögu í fréttum fjölmiðla vegna ásakana um að þeir hafi drepið heimilisketti.

Sjá einnig: Drápshundarnir í Laugarneshverfi taldir hafa drepið þriðja heimilisköttinn

Í frétt DV um hundana frá síðasta sumri segir:

„Þrír hundar í Laugarneshverfi eru taldir hafa drepið heimiliskött á fimmtudag. Hundarnir hafa valdið talsverðum usla í hverfinu en um jólin 2021 fjallaði DV um að hundarnir, sem þá voru tveir, drápu tvo ketti með skömmu millibili. Annan köttinn tættu þeir í sig á Þorláksmessu sem vakti mikinn óhug í hverfinu. Helga Björg Heiðdal, eigandi kattarins segir ótækt að yfirvöld bregðist ekki við og fjarlægi hundana frá eigendum sínum en MAST hafi ítrekað fengið ábendingar um ástandið.“

Hundarnir hafa gengið lausir um Langholtshverfi í kvöld og valdið miklum usla miðað við umræður í íbúahópnum. Óstaðfestar fréttir herma að þeir hafi drepið að minnsta kosti tvo ketti í kvöld.

Samkvæmt tilkynningu á Kattavaktinni á Facebook er búið að handsama hundana. Nánari upplýsingar um það liggja ekki fyrir.