Sergei Yevsyukov var fangelsisstjóri í Oleniyka fangelsinu en það er í daglegu tali kallað „pyntingafangelsið“. Hann var mjög harðhentur við úkraínska stríðsfanga en þeir hafa margir hverjir endað í fangelsinu. En þeir þurfa ekki að hafa meiri áhyggjur af honum því hann lést þegar bílsprengja sprakk í bíl hans. Var úkraínska leyniþjónustan þar að verki.

BBC skýrir frá þessu og segir að bílsprengja hafi sprungið í bíl þessa 49 ára gamla fangelsisstjóra þegar honum var ekið á herteknu svæði í Donetsk.

Sprengjunni virðist hafa verið komið fyrir undir Toyota bíl Yevsyukov. Konan hans var með í för og særðist hún alvarlega. The Mirror segir að hún hafi misst annan fótinn.

Yevsyukov var ekki fyrsti háttsetti Rússinn, með náin tengsl við Kreml, sem Úkraínumenn hafa gert út af við. Í apríl og október drápu þeir rússneska embættismenn með bílsprengjum.