Þorpið Jonestown þekkja ef til vill margir en það var lítið þorp í norðvesturhluta landsins þar sem meðlimir sértrúarsafnaðarins Peoples Temple bjuggu. Um var að ræða bandarískan söfnuð en leiðtogi hans, Jim Jones, flutti söfnuðinn til Gvæjana árið 1974 eftir að bandarísk yfirvöld hófu rannsóknir á meintum skattsvikum hans.
Jim lofaði meðlimum safnaðarins gulli og grænum skógum en líf íbúa var enginn dans á rósum þar sem vinnudagar voru langir og lítið til að borða. Árið 1978 létust um 900 meðlimir safnaðarins, þar á meðal hátt í 300 börn sem voru myrt með eitri.
Sjá einnig: Jonestown-fjöldamorðin og fjöldasjálfsvígin
Í frétt AP kemur fram að ferðaþjónustufyrirtæki, sem nýtur stuðnings yfirvalda, vilji breyta Jonestown í ferðamannastað. Ekki eru allir á eitt sáttir við þetta enda og vilja gagnrýnendur meina að verið sé að sverta minningu fórnarlamba þeirra sem létust í Jonestown.
„Við teljum að það sé kominn tími á þetta. Það eru svona staðir út um allan heim sem geyma myrka sögu,“ segir Rose Sewcharran, framkvæmdastjóri Wanderlust Adventures, og bendir á Auschwitz máli sínu til stuðnings.
Í frétt AP er rædd við Jordan Vilchez sem flutti til Jonestown þegar hún var 14 ára gömul. Hún yfirgaf Jonestown daginn áður en hörmungarnar dundu yfir en missti tvær systur sínar og tvo frændur.
Vilchez, sem er 67 ára, segir að Gvæjana eigi allan rétt á að gera það sem yfirvöld vilja á svæðinu. „En á hinn er nauðsynlegt að sýna því virðingu að þarna var fólk platað í dauðann,“ segir hún og bætir við að nauðsynlegt sé að ferðamenn séu vel upplýstir um það sem nákvæmlega átti sér stað og af hverju svo margir kusu að fylgja Jim Jones.
Svæðið sem hýsti Jonestown er mjög afskekkt og aðeins er hægt að komast þangað með þyrlu eða báti.
