Það hefur verið ljóst frá því að Rússar réðust inn í Úkraínu að mannfall þeirra hefur verið mikið. Þeir hika heldur ekki við að senda hermenn sína út í opinn dauðann og hefur bardögum á ákveðnum svæðum við víglínuna verið líkt við hakkavél, því Úkraínumenn hafa einfaldlega setið í varnarstöðvum sínum og stráfellt rússneska fótgönguliða sem eru sendir út í opinn dauðann.

Sky News segir að eftir því sem Úkraínumenn segi þá hafi Rússar nýlega misst rúmlega 2.000 hermenn á einum sólarhring, nær sú tala yfir fallna og særða.

Rússneskir ráðamenn vísa öllum tölum Úkraínumanna og Vesturlanda um mannfall þeirra á bug en birta sjálfir ekki neinar tölur og fara raunar með slíkar upplýsingar eins og ríkisleyndarmál.

Sky News hefur eftir vestrænum embættismanni að mannfallstölur Rússar „sýni grimmdarlega veruleikann í fremstu víglínu og líkist því sem gerðist við Somme“. Þar vísar hann í orustuna við Somme í Frakklandi í fyrri heimsstyrjöldinni en hún var ein sú stærsta og blóðugasta í því stríði.

Vestrænir embættismenn segja að Rússar hafi misst 2.030 menn þann 28. nóvember sem sé nýtt met hvað varðar mannfall og í fyrsta sinn sem þeir misstu rúmlega 2.000 menn á einum degi.

Meðalmannfall Rússa á degi hverjum í nóvember er sagt hafa verið rúmlega 1.500 og var það þriðja mánuðinn í röð sem þeir misstu að meðaltali rúmlega 1.500 menn á dag.