Heimasíða Virðingar dularfull og illfinnanleg á netinu – „Við munum grípa til allra þeirra ráða til þess að stöðva þetta“
Félagið Virðing, sem gert hefur umdeildan kjarasamning við SVEIT, félag sem sumir veitingamenn eru í, titlar sig sem stéttarfélag en heimasíða félagsins er hálf falin og mjög takmarkaðar upplýsingar þar að finna. Ekkert símanúmer er gefið upp á síðunni og ekki næst í framkvæmdastjóra. ASÍ telur heiti hins nýja félags ósvífni og innan verkalýðshreyfingarinnar er rætt um málsókn gegn því.
„Við erum að undirbúa frekar aðgerðir. Við erum að ráðfæra okkur við lögmenn og erum í miklum samskiptum við Alþýðusambandið,“ segir Sólveig Anna Jónsdóttir, formaður Eflingar sem vakti athygli á hinu nýja félagi og samningi þess við félagið SVEIT í vikunni.
Veitingamenn, og fólk þeim tengt situr í stjórnum beggja félaga og mikil tengsl eru á milli félaganna, bæði fjölskyldu og eignatengsl. Efling hefur lýst Virðingu sem gulu stéttarfélagi, það er stéttarfélagi sem er stjórnað af atvinnurekendunum sjálfum en ekki launafólki. Hefur Efling varað við Virðingu og hvatt fólk sem fær boð um að ganga í félagið til að tilkynna það til Eflingar. Kjarasamningur sé mun lakari, og meðal annars sé vinna til 20 á kvöldin og á laugardögum skilgreind sem dagvinna.
Miðstjórn Alþýðusambands Íslands gaf út yfirlýsingu í gær þar sem tekið var undir sjónarmið Eflingar. Var nafngiftin Virðing sögð ósvífni.
„Félög af þessum toga eru ekki stéttarfélög í skilningi Stjórnarskrár Íslands, laga nr. 80/1938 eða í skilningi mannréttindasáttmála sem Ísland er aðili að. Nú þegar eru í gildi löglegir kjarasamningar fyrir yfirgnæfandi meirihluta þess launafólks sem í þessum geira vinnur um land allt, þ.m.t. fyrir yfirgnæfandi meirihluta þess launafólks sem vinnur hjá aðildarfyrirtækjum SVEITAR og sem eru félagsmenn í Eflingu og öðrum stéttarfélögum innan ASÍ,“ sagði í tilkynningunni.
Til umræðu innan verkalýðshreyfingarinnar eru næstu skref, sem kunna að vera málarekstur gegn hinu nýja félagi.
„Það er samtal í gangi innan hreyfingarinnar og á milli lögmanna um hver næstu skref verði. En við munum grípa til allra þeirra ráða til þess að stöðva þetta,“ segir Sólveig Anna.
Heimasíða Virðingar kemur ekki upp við einfalda leit á leitarvél eins og Google. DV fékk upplýsingar um lénið, virdingstettarfelag.is, en þar var litlar upplýsingar að finna.
Ekkert símanúmer félagsins er skráð á síðunni en Valdimar Leó Friðriksson, fyrrverandi þingmaður, titlaður framkvæmdastjóri og tengiliður. DV hefur ítrekað reynt að ná tali af Valdimar símleiðis á undanförnum dögum en ekki er svarað í símann. DV sendi einnig fyrirspurn á það netfang sem upp er gefið á heimasíðunni en engin svör hafa borist.
Starfsfólk á veitingastöðum á Íslandi er að stórum hluta innflytjendur, margir hverjir óvissir um réttindi sín á íslenskum vinnumarkaði. Engu að síður er heimasíða Virðingar, þar sem finna má kjarasamninginn, aðeins á íslensku en ekki á til dæmis ensku og pólsku eins og heimasíða Eflingar er þýdd á. Lén heimasíðu Virðingar er skráð á lögfræðiskrifstofu.
Á heimasíðunni er sagt að Virðing reki orlofssjóð en ekkert nánar útlistað um það. Engin orlofshús koma fram. Ekkert er heldur sagt um neina styrktarsjóði, útgáfur eða áætlanir en sagt er að félagsmönnum verði boðið upp á námskeið í framtíðinni, þó ekki tilgreint hvenær.
Félagið er sagt hafa heimilisfang að Ármúla 6 í Reykjavík en ekkert er að finna í símaskrá um félagið á því heimilisfangi, né öðru. Ekki er uppgefinn neinn opinn skrifstofutími. Myndirnar á heimasíðunni eru ekki teknar af íslensku starfsfólki veitingastaða, heldur fengnar frá Pexels, fríum erlendum myndabanka á netinu.
Hins vegar eru ítarlegar skýringar á iðgjöldum félagsins og bankareiknings upplýsingar.
