Bree Olson hætti að leika í klámmyndum til að geta lifað eðlilegu lífi og njóta virðingar – Það hefur reynst þrautin þyngri
Ástæða þess að hún hætti er sú að hún vildi lifa eðlilegu lífi og án þess áreitis sem fylgir því að vera vinsæl klámmyndaleikkona. Þessi iðnaður veltir milljörðum Bandaríkjadala árlega og var Olson en vinsælasta klámmyndaleikkona Bandaríkjanna áður en hún ákvað að hætta.
Þó að fjögur ár séu liðin hefur líf Olson ekki verið neinn dans á rósum síðan þá. Hún verður enn fyrir stöðugu áreiti og segir að fólk komi fram við hana eins og hún sé kynferðisglæpamaður. Stundum líða dagar, jafnvel vikur, milli þess sem Olson fer út úr húsi. Olson skrifaði um reynslu sína á vefinn The Daily Dot, en áður lýsti hún þessari reynslu sinni þáttaröð sem ber heitið Real Women Stories. Myndband úr þættinum má sjá hér neðst í fréttinni.
„Þegar ég byrjaði að leika í klámmyndum var ég nítján ára. Mig langaði að prófa mig áfram og fannst þetta heillandi. Á þeim tíma var ég nemi við Purdue-háskólann þar sem ég lagði stund á líffræði. Samhliða námi vann ég við símasölu. Ég flaug til Los Angeles þar sem ég prófaði þetta og það kom mér strax á óvart hversu mikla peninga var hægt að þéna,“ segir Bree um ástæðu þess að hún ákvað að feta þessa braut til að byrja með.
Peningarnir voru helsta ástæða þess að hún hélt í þessum iðnaði og segist hún hafa notið stuðnings vina og fjölskyldu sinnar. Árin liðu og Bree mokaði inn seðlum. Þegar hún var 25 ára ákvað hún að vanda sínu kvæði í kross og hætta, meðal annars til að geta lifað eðlilegra lífi fjarri sviðsljósinu. En það reyndist þrautin þyngri. Það var þá sem hún áttaði sig á dómhörku samfélagsins. „Ég hætti til að reyna að öðlast virðingu á nýjan leik. Ég reyndi og reyndi en sama hvað ég reyndi gekk það ekki. Fólk leit á mig eins og ég væri kynferðisglæpamaður,“ segir hún. Hún áttaði sig svo á því að hún gæti líklega aldrei fengið venjulegt starf, til dæmis við kennslu eða hjúkrun. Auðvelt væri fyrir yfirmenn hennar að reka hana ef skjólstæðingum liði illa í návist hennar.
Fjórum árum eftir að Bree sagði skilið við klámmyndabransann eru myndbönd af henni enn á þúsundum klámsíðna, andlitið út um allt. Fleiri þekkja hana en kæra sig um að viðurkenna. Í dag er staðan þannig að Bree sér eftir því að hafa hætt að leika í klámmyndum. Iðnaðurinn er þannig uppbyggður að klámleikarar fá engar greiðslur eftir að þeir hætta að leika í klámmyndum, ólíkt til dæmis tónlistarmönnum sem fá greidd stefgjöld. Hún segist sjá eftir því að hafa snúið baki við peningunum og þeirri ákvörðun að hafa hætt til að öðlast meiri virðingu. „Ég hefði átt að halda áfram í fimm ár í viðbót, að minnsta kosti, til að fjárhagsstaða mín yrði betri. Ég hefði getað lagt nógu mikið fyrir til að þurfa ekki að hafa áhyggjur það sem eftir er.“
Hún segir að skilaboð hennar til ungra stúlkna séu einföld: „Farið varlega. Þegar þú ákveður að fara í þennan iðnað eða hætta í honum mun ekkert gerast af sjálfu sér. Lífið er nógu erfitt fyrir, ekki leggja þetta á þig. Peningarnir eru ekki þess virði þegar upp er staðið. Það var ekki klámið sem skaðaði mig heldur viðbrögð samfélagsins við því að ég ákvað að feta þessa braut,“ segir Bree.
