Gerður Arinbjarnardóttir eigandi kynlífstækjaverslunarinnar Blush segir frá óheppilegum mistökum sem áttu sér stað við afgreiðslu í versluninni í gær, rétt fyrir lokun kl. 18. Tveir einstaklingar voru að versla mjög ólíkar vörur og völdu að láta pakka þeim inn fyrir sig. 

Annar þeirra, karlmaður, var að kaupa gjöf handa eiginkonunni til að koma henni á óvart. Hinn var að kaupa allt aðra og engan veginn rómantíska gjöf, hnefa. Svo óheppilega vildi til að pakkarnir svissuðust og fóru einstaklingar því úr versluninni með ranga vöru. 

„Þetta er í fyrsta skipti, þetta hefur aldrei gerst áður og við erum miður okkar. Hann heldur að hann sé að fara að gefa henni ótrúlega flottan pakka, en hann fékk vitlausan pakka með hnefa í. Hvað eigum við að gera?“ segir Gerður í story á samfélagsmiðlum.

Segir hún að það hafi náðst í einstaklinginn sem ætlaði að kaupa hnefann, sá fékk rétta vöru afhenta. Hins vegar veit Gerður ekki hver rómantíski eiginmaðurinn er og veltir fyrir sér hvort að mistökin eigi jafnvel ekki eftir að koma í ljós fyrr en á jólnum þegar eiginkonan opnar pakkann.

„Ég vona svo innilega að þetta fólk sem varð fyrir þessum mistökum hafi húmor fyrir þessum mistökum. Þetta eru bara mannleg mistök. Nennirðu plís senda mér skilaboð áður en þú réttir konunni þinni pakkann, en ef hún er búin að opna hann þá biðst ég innilegrar afsökunar. Og plís nennið þið að hlæja að þessu með okkur. Við erum án gríns í sjokki en getum samt ekki gert annað en að brosa af því þetta er svo grátbroslega fyndið eitthvað.“ 

Gerður segir að Jakob unnusti hennar hafi „stærstu áhyggjurnar af því að þessi maður verði einhleypur á morgun.“ 

„Þetta er leiðinlega klaufalegt klúður af okkar hálfu.“