Oft er erfitt að horfast í augu við fortíðina en engu að síður nauðsynlegt. Ég skrifaði grein um daginn til að minna formann Miðflokksins, Sigmund Davíð Gunnlaugsson, á eigin sögu og framlag til loftslagsmála þegar hann gegndi embætti forsætisráðherra. Eitthvað virðist greinin hafa komið við kauninn á Sigmundi þar sem hann svarar mér í netgrein og sakar mig um að fara með fleipur.
Förum yfir nokkur atriði:
- Þegar forsætisráðherra mætir á fund um loftslagsmál er það vegna þess að ráðherranum þykir fundurinn mikilvægur og mikil vigt felst í því að ráðherrann, sem er í forsæti, láti sig málið varða. Það hafa aldrei jafn margir ráðherrar mætt á Loftlagsfund S.Þ. eins og þegar Sigmundur mætti ásamt samflokksráðherrum sínum Gunnari Braga og Sigrúnu Magnúsdóttur.
- Í grein minni vitna ég beint í ræðu Sigmundar á Parísarfundinum og því varla málefnalegt að segja mig fara með fleipur, hvað varðar eldræðu Sigmundar á fundinum.
- Sömuleiðis er það staðreynd en ekki fleipur að Ísland tók þátt í bandalagi með nokkrum öðrum þjóðum sem vildu setja meiri metnað í aðgerðir en niðurstaðan varð. Bandalagið var kallað metnaðarbandalagið vegna þess að þjóðirnar vildu að markið væri sett á 1,5 gráðu hækkun en ekki 2 gráðu hækkun.
- Eins er formaðurinn varla að afneita eigin þingmáli sem þingflokkur Miðflokksins hefur ítrekað lagt fram og snýr að því að stórefla innlenda matvælaframleiðslu með aðgerðum sem flestar er hægt að skilgreina sem loftslagsaðgerðir og stórauka með því útgjöld í málaflokkinn.
- Sem forsætisráðherra ákvað Sigmundur að setja af stað rannsókn á því að leggja sæstreng til Bretlands með forsætisráðherra Bretlands. Það var ákvörðun að setja hópinn af stað, ekki nauðung. Það hefur verið minnst á það við mig af erlendum aðilum að skoða slíka lagningu. Ég hef aldrei ljáð máls á því og mun ekki gera, ólíkt Sigmundi. Hann getur ekki talað sig frá því.
Eins ágætur og Sigmundur Davíð er þá verður hann að geta horfst í augu við staðreyndir.
Höfundur er ráðherra og oddviti lista Sjálfstæðisflokksins í Reykjavíkurkjördæmi norður.
