„Líklega kýs ég ekki Miðflokkinn eftir að hafa lesið grein eftir Snorra Má frambjóðanda um samskipti hans við Kára Stefánsson,“ segir Össur en eins og kunnugt er hafa Snorri og Kári átt í orðaskiptum á opinberum vettvangi síðustu daga.
Sjá einnig: Segir Kára hafa oft hótað sér barsmíðum
Kári reið á vaðið og sagði að Snorri væri búinn að koma sér í erfiðar aðstæður með því að velja flokk þar sem honum mislíkar stefnumálin. Snorri eigi erfitt með að horfast í augu við sjálfan sig.
Þessu svaraði Snorri svo í gær og rifjaði upp fyrstu kynni sín við Kára fyrir tíu árum, þegar hann sat einn við borð á kaffihúsi og sölsaði undir sig tvö borð, annað fyrir bækur sínar og kaffi og hitt fyrir tölvu.
Rifjar Össur upp skrif Snorra og segir:
„Svo fylltist kaffihúsið af gestum, og það vantaði borð. Flestir hefðu sýnt tillitsemi og gefið eftir annað borðið. Hinn tilvonandi Miðflokksmaður sá þó enga ástæðu til þess. Þá bar að jafnaðarmanninn Kára sem bað kurteislega um að fá annað borð Snorra. Því neitaði Snorri og einu gilti þó kaffihúsið væri orðið troðfullt. Kári yggldi sig þá og gaf til kynna að hann myndi ella láta hendur skipta. Þá sá Snorri sitt óvænna og skilaði loks borðinu.“
Össur endar beitt skrif sín á heldur köldum kveðjum til Snorra og Miðflokksins:
„Setji maður samasemmerki á milli Snorra og innvolsins í Miðflokknum má kannski draga eftirfarandi ályktanir af þessari sögu: Miðflokkurinn tekur ekki tillit til annarra, hann er frekur en kjarklítill og flýr af hólmi frekar en standa á sínu. – Þurfum við nokkuð svoleiðis flokk?“
