Það verður svo sannarlega ekki auðvelt fyrir Liverpool og Manchester City að næla í miðjumanninn Martin Zubimendi á næsta ári.

Um er að ræða gríðarlega öflugan leikmann sem er á mála hjá Real Sociedad í spænsku úrvalsdeildinni.

Zubimendi gæti vel verið á förum frá Sociedad næsta sumar en hann var nálægt brottför á þessu ári.

Samkvæmt Marca þá ætlar Real Madrid að berjast við bæði Liverpool og City um þjónustu leikmannsins.

Zubimendi er með kaupákvæði í samningi sínum hjá Sociedad og er fáanlegur fyrir 60 milljónir evra.

Liverpool reyndi að fá Zubimendi í sínar raðir í sumar en mistókst að klófesta sinn mann.