Dómstóll í Bangkok komst að þeirri niðurstöðu að hún hefði eitrað fyrir efnaðri vinkonu sinni þegar þær voru saman á ferðalagi á síðasta ári. Hún setti blásýru í mat og drykk vinkonunnar.
Fjölskylda vinkonunnar trúði ekki að andlátið hefði borið að með eðlilegum hætti og krufning leiddi í ljós að blásýra var í líkama hennar. Sararat var handtekin þegar niðurstaða krufningarinnar lá fyrir.
Rannsókn lögreglunnar leiddi í ljós að fleiri af vinum hennar höfðu látist á svipaðan hátt frá árinu 2015. Einn vina hennar lifði morðtilraunina af. BBC skýrir frá þessu.
Lögreglan segir að Sararat sé spilafíkill og hafi skuldað háar fjárhæðir vegna þess. Hún beindi spjótum sínum því að vinum sínum sem hún skuldaði peninga. Þegar hún hafði gert út af við fólkið, stal hún skartgripum þess og öðrum verðmætum.
Í apríl á síðasta ári fór hún í ferðalag með vinkonu sinni, hinni 32 ára Siriporn Khanwong. Þær fóru til héraðs vestan við Bangkok og tóku þátt í trúarathöfn við á þar. Daginn eftir hneig Siriporn örend niður eftir að hafa snætt með Sararat.
Lögreglan segir að Sararat hafi ekki gert neitt til að aðstoða vinkonu sína þegar hún lá lífvana á gólfinu. Eins og áður sagði, fundust leifar af blásýru í líki hennar og farsími hennar, peningar og taska voru horfin þegar komið var að henni.
Sararat neitaði að hafa orðið vinkonu sinni að bana.
Fyrrum eiginmaður hennar, sem er fyrrum lögreglumaður, og lögmaður hennar voru einnig ákærðir í málinu. Eiginmaðurinn fyrrverandi var dæmdur í 16 mánaða fangelsi og lögmaðurinn í tveggja ára fangelsi. Þeir voru fundnir sekir um að leyna sönnunargögnum til að aðstoða Sararat við að komast hjá því að verða ákærð. Lögreglan telur að eiginmaðurinn fyrrverandi hafi aðstoðað hana við eitra fyrir einum af fyrrum unnustum hennar. Hann þvertekur fyrir að hafa komið nálægt því.
Lögreglan telur að hún hafi myrt 14 vini sína og vinnur að rannsókn á þeim málum.
