Ólafur, sem er einnig almannatengill hjá Proforma, vakti athygli á dögunum þegar hann brá á það ráð að senda Kennarasambandi Íslands reikning vegna tekjutaps af völdum verkfallsins.
„Reikningurinn er fyrir þann hluta af dagvinnutíma sem ég hef lagt af mörkum til að vera með tveggja ára afabarnið vegna þess að hún er útilokuð frá leikskólanum. Ég sinni henni með glöðu geði, en á meðan afla ég ekki tekna,“ sagði Ólafur á Facebook-síðu sinni fyrir skemmstu en reikningurinn var upp á rúmar 300 þúsund krónur sem byggist á útseldum taxta hans sem ráðgjafi í almannatengslum.
Sjá einnig: Sakar kennara um óþverraskap
Í grein sinni gerir Ólafur að umtalsefni KÍ reiðubúið að aflýsa verkföllum í fjórum leikskólum | Kennarasamband Íslands þess efnis að það sé reiðubúið að aflýsa verkföllum í fjórum leikskólum með þeim skilyrðum að sveitarfélögin skuldbindi sig til að greiða laun þeirra starfsmanna sem voru í verkfalli. Leikskólarnir sem um ræðir eru leikskóli Seltjarnarness, Drafnarsteinn í Reykjavík, Holt í Reykjanesbæ og Ársalir á Sauðárkróki. Voru borgarstjóri og bæjarstjórar beðnir um að svara erindinu eigi síðar en klukkan 12 í dag.
Ólafur segir í grein sinni að það skipti engu þó mörgum þyki sérkennilegt að borga fólki laun í verkfalli og þyki það jaðra við að borga lausnargjald.
„Þetta tilboð er leið Kennarasambandsins til að halda andlitinu. Kennarasambandið viðurkennir að þetta örverkfall í nokkrum leikskólum hafi verið tóm vitleysa, en pínir sveitarfélögin til að kyngja skítnum með sér,“ segir hann.
Hann segir sjálfsagt að sveitarfélögin taki þátt í leiknum með Kennarasambandinu því þau hefðu hvort sem er þurft að borga launin. Þau tapi engu.
„Að vissu leyti má virða forystu Kennarasambandsins fyrir að sjá að sér og gera þetta tilboð. Það sýnir skilning á því að verkfall í leikskólum hefur miklu verri afleiðingar en verkföll í grunnskólum og framhaldsskólum.“
Ólafur bendir á að leikskólaverkfall skelli af miklum þunga á foreldrum leikskólabarna og nánustu aðstandendum þeirra. Börn á leikskólaaldri þurfi stöðuga gæslu og umönnun en eldri börn miklu síður.
„Fyrir þau 600 leikskólabörn sem hafa verið án leikskólans undanfarnar fjórar vikur hafa 600 fullorðnir verið frá vinnu eða öðrum verkefnum í fullu starfi að sinna litlu börnunum, oftast án launa eða með því að taka út frídaga næsta árs.“
Ólafur segir svo að lokum að það sé svo annað mál að leikskólaverkfallið hafi ekki „gárað vatnið“ í samningaviðræðum kennara og sveitarfélaga. Það sýni tilgangsleysi þess og sé því í raun sjálfhætt.
„Samninganefnd ríkis og sveitarfélaga þarf enga skoðun að hafa á réttmæti málsins. Henni ber að sýna foreldrum og aðstandendum þessara 600 leikskólabarna skilning á stöðu þeirra og samþykkja tilboð Kennarasambandsins um greiðslu lausnargjalds.“
