Í nýjasta þætti af Íþróttavikunni á 433.is gerðu þeir Helgi Fannar, Hörður Snævar og Hrafnkell Freyr leiki íslenska karlalandsliðsins á dögunum vel upp.

Ísland vann Svartfjallaland 0-2 en tapaði svo 4-1 gegn Wales sem þýðir að liðið fer í umspil um að halda sæti sínu í B-deild Þjóðadeildarinnar. Landsliðsfyrirliðinn Aron Einar Gunnarsson sneri aftur gegn Svartfellingum en fór snemma af velli vegna meiðsla.

„Ég er ekki viss um að hann hefði byrjað ef Daníel Leó hefði verið með. Við sjáum það að þegar Aron fer út af er hann ekki með hafsent með Gulla. Við erum bara í hallæri dauðans þarna svo ég gat alveg skilið þá pælingu að fá rödd og leiðtoga þarna. En frá fyrstu mínútu sá maður að fyrirliðinn var ekki heill,“ sagði Hörður um þá ákvörðun að byrja Aroni í leiknum.

„Manni leið illa að sjá hann þegar hann meiddist. Svipurinn var þannig að hann var mögulega að hugsa hvort þetta hafi verið hans síðasti landsleikur, maður veit það ekki. Hann gæti farið í þetta verkefni í mars en svo er hann auðvitað að fara í Þór næsta sumar. Hann hefur lifað fyrir þetta landslið og lagt ýmsilegt á sig til að koma aftur inn. Þetta hefur verið mikið áfall fyrir hann.“

Umræðan í heild er í spilaranum.