Yfirvöld í Rússlandi hafa hótað því að svara með kjarnorkuvopnum ákveði Úkraínumenn að skjóta langdrægum eldflaugum frá Vesturlöndum á rússneska grund.

Eins og greint hefur verið frá hefur Joe Biden Bandríkjaforseti heimilað Úkraínumönnum að nota langdrægar flaugar frá Bandaríkjunum gegn Rússlandi. Um er að ræða flaugar sem geta dregið rétt rúma 300 kílómetra og yrðu þá notaðar á hernaðarleg skotmörk í Rússlandi.

Dmitry Peskov, talsmaður stjórnvalda í Kreml, sagði í morgun að Rússar myndu áskilja sér rétt til að beita kjarnorkuvopnum ef „hefðbundnum vopnum“ yrði beitt gegn Rússlandi.

Yfirlýsing Peskov kemur í kjölfar þess að Vladimír Pútín Rússlandsforseti samþykkti uppfærslu á kjarnorkuáætlun landsins. Kveður breytingin á um að Rússar geti beitt kjarnorkuvopnum ef ráðist verður á þá með „hefðbundnum eldflaugum“ frá ríki sem ekki er búið kjarnorkuvopnum en nýtur stuðnings ríkis sem býr yfir slíkum vopnum.

Eldflaugaskot frá Úkraínu með bandarískum eldflaugum myndi falla undir þessa skilgreiningu.

Í umfjöllun Mail Online kemur fram að Rússar séu búnir undir það að bæði Bretar og Frakkar muni fylgja í fótspor Bandaríkjanna og heimila Úkraínumönnum að nota vopn þaðan gegn Rússum. Hvorki Bretar né Frakkar hafa þó gefið eitthvað út um það.