Leila, forseti Palmeiras í Brasilíu, hefur skotið föstum skotum á stórstjörnuna Neymar sem er á mála hjá Al-Hilal.

Neymar hefur spilað einn leik á þessu ári vegna meiðsla en hann meiddist í landsleik með Brasilíu undir lok síðasta árs.

Neymar virðist ekki vera að ná sér af þessum meiðslum en hann sneri aftur nokkuð nýlega áður en hann þurfti að fara af velli.

Lið í heimalandi hans, Brasilíu, eru orðuð við stórstjörnuna en Leila stendur fast á því að hann sé ekki velkominn til Palmeiras.

,,Neymar mun ekki semja við Palmeiras, við erum ekki sjúkrahús,“ sagði Leila og var ákveðin í sínum tón.

,,Ég vil fá leikmann inn sem getur byrjað á morgun ef þjálfarinn biður um það. Ég sætti mig ekki við að fá inn leikmenn sem geta ekki spilað.“