Stórstjarnan Andy Carroll er í vandræðum þessa stundina eftir atvik sem átti sér stað á hans fyrrum heimili í Essex.

Carroll ákvað að reyna að lauma sér inn á fyrrum heimili sitt sem er í eigu þeirra beggja en Billi býr þar ásamt börnum hjónanna.

Carroll sá til þess að Billi væri ekki heima á þessum tíma en myndavélar fyrir utan eignina létu hana vita af því að óboðinn gestur væri mættur.

Frá þessu greina enskir miðlar en Carroll er í dag í sambandi með konu sem ber nafnið Lou Teasdale.

Billi sá allt sem átti sér stað í gegnum forrit í símanum sínum en þau ákváðu að skilja á síðasta ári eftir níu ára samband.

Ástæðan fyrir heimsókn Carroll er í raun óljós en hann og Billi eiga saman þrjú börn sem voru ekki heima á þessum tímapunkti.

Billi er enn reið út í Carroll sem var ekki lengi að finna sér nýja kærustu eftir skilnaðinn og opinberaði það snemma í fjölmiðlum.

Carroll er fyrrum enskur landsliðsmaður en er í dag hjá Bordeaux í Frakklandi sem leikur í fjórðu efstu deild eftir gjaldþrot.