Á Facebook má gjarnan finna mjög skemmtilega umræðu og ein þeirra rataði í fréttir í vikunni, nafnaþráður sem finna má í Facebook-hópnum Þrifatips. Umræðuefnið í þræðinum er nöfn á ryksuguvélmennum.
Þráðurinn sló í gegn og margir að deila nöfnum sem viðkomandi hefur gefið ryksuguvélmenninu á heimili sínu. Innblástur finnst víða eins og sést á nöfnunum, en 413 athugasemdir eru við færsluna þegar þetta er skrifað.
„Við vorum í smá erfiðleikum með að finna nafn,“ segir Anna María Guðlaugsdóttir, upphafskona þráðarins, í samtali við K100. En hún ætlaði að nýta sér umræðuna til að fá hugmyndir að nöfnum fyrir nýja Roborock-ryksuguvélmennið sitt.
Tryllitækið hefur nú fengið nafnið Þrifbjörn, og er kallaður Bjössi.
„Bjössi sinnir sínum heimilisverkum mjög vel og semur ágætlega við hundinn á heimilinu. Honum finnst samt fátt skemmtilegra en að trufla svefn tíkarinnar þegar hún hvílir sig á gólfinu.“
Í frétt á K100 eru talin upp fjölmörg skemmtileg nöfn sem finna má á þræðinum. Friðryka og Friðryk, Rúryk, Rykmund, Rykgrím og Rykey, sem eigendur sögðu að veittu þeim frið frá rykinu. Hreindýrið og Hreinfríður voru vinsæl á nokkrum heimilum.
Margir sóttu innblástur til þekktra einstaklinga þegar kom að nafngjöfinni: Sogfríður, Sogrún Diego, Sogi Bergmann, Suckerberg, Þrifryk Dór, Clean Elizabeth og Obi Wan Cleanobi.
Nokkrir nefndu þetta þarfatæki eftir Monicu Geller, úr þáttunum Friends en eitt fékk hins vegar nafnið Chandler Bing eftir eiginmanni Geller. Þar var það uppþvottavélin sem var kölluð Monica. „Svo þau hjónin fá að sinna þrifunum hjá mér,“ sagði þessi eigandi sem mögulega er mikill aðdáandi Friends.
Ryk-í Martin var á einu heimili og hafði tekið við af gamla ryksuguvélmenninu Ryk Forrester. Dustin Timberlake og Dustin Bieber voru á nokkrum heimilum sem og Kleanu Reeves. Nokkrar Öskubuskur virtust einnig starfa á íslenskum heimilum.
Sonur eins eiganda, fimm ára gamall, nefndi ryksuguna á heimilinu Farara – „þar sem hann fer um alla íbúð.“ „Greyið. Já, skellum greyinu í gang,“ sagði einn á þræðinum.
„Maðurinn minn vill ekki skíra börnin Bogi, bara Logi. Þannig að minn fékk nafnið Bogi Ágústsson,“ sagði ein kona.
Á meðal annarra nafna má nefna Stella (ekki í orlofi), Sir CleanAlot, kúrí Rúrý, Tuski, Blöö og Róberta Soglína.
Er ryksuguvélmenni á þínu heimili og hvað heitir tækið?
