Í gær skrifaði Rúnar Páll Sigmundsson undir þriggja ára samning um að þjálfa meistaraflokk karla hjá Gróttu. Rúnar Páll er knattspyrnuáhugafólki að góðu kunnur en hann þjálfaði lið Stjörnunnar í rúmlega sjö ár og Fylki í þrjú. Stjarnan varð Íslandsmeistari undir stjórn Rúnars sumarið 2014, bikarmeistari 2018 og lék fjölda Evrópuleikja.

Rúnar Páll er fimmtugur, fæddur og uppalinn Garðbæingur. Hann er íþróttafræðingur að mennt og lauk UEFA Pro þjálfaragráðu hjá sænska knattspyrnusambandinu árið 2018. Sem leikmaður spilaði Rúnar með Stjörnunni, Fram og HK og Sogndal í Noregi. Þar í landi starfaði Rúnar einmitt á árunum 2010 til 2012 þar sem hann stýrði liði Levanger í 2. deild og tók þátt í hraðri uppbyggingu félagsins.

Þorsteinn Ingason, formaður stjórnar, skrifaði undir samninginn við Rúnar í gærkvöldi ásamt Magnúsi Helgasyni yfirmanni knattspyrnumála. Þorsteinn fagnar komu Rúnars í Gróttu:

„Það er óhætt að segja að við séum himinlifandi með komu Rúnars Páls á Nesið. Við reyndum eftir fremsta megni að vanda til verka við ráðningu á nýjum þjálfara enda eru mikilvægir tímar framundan hjá karlaliði Gróttu – við ætlum okkur aftur upp í Lengjudeildina en um leið byggja upp lið sem getur gert sig gildandi þar á næstu árum. Með Rúnari kemur mikil orka og drifkraftur og við hlökkum til að fylgjast með honum aðlagast og setja sinn svip á Gróttusamfélagið.”
Rúnar er klár í slaginn:

„Ég er mjög spenntur fyrir verkefninu og hlakka til að byrja að vinna með strákunum og kynnast fólkinu í félaginu. Grótta hefur staðið sig vel í uppbyggingu síðustu ár en nú hefst ný vegferð hjá karlaliðinu. Við ætlum ekki að stoppa lengi í 2. deild en vitum að baráttan verður bæði hörð og skemmtileg.”