Camila Mayan fyrrum unnusta Alexis Mac Allister leikmanns Liverpool hefur höfðað dómsmál gegn honum og vill greiðslur fyrir að búa erlendis með honum í mörg ár.
Málið er höfðað í heimalandi þeirra Argentínu, Mac Allister sleit sambandinu í lok árs árið 2022. Skömmu áður varð hann Heimsmeistari.
„Það var ekkert samband lengur,“ segir Mac Allister sem er rólegur yfir þessu.
„Hún fór sína leið og ég mína, málið er hjá lögfræðingum og dómstólum. Þar á það heima. Hún tók þá ákvörðun að ræða þetta opinberlega en ég veit hvernig málið var.“
Mac Allister hefur fundið ástina á nýjan leik og sakar Mayan hann um framhjáhald.
„Ég er hamingjusamur í dag að búa til nýtt líf á Englandi og njóta þess með henni,“ segir Mac Allister um Ailén Cova unnustu sína.
