Ástralskur ríkisborgari hefur verið dæmdur í fjögurra og hálfs árs fangelsi í óvenjulegu máli. Í september 2014 fór maðurinn, Mohamed Ahmed Omer, í mánaðarlangt frí með eiginkonu sinni og tveimur ungum börnum til Afríkuríkisins Súdans.

Þegar þangað var komið stal hann vegabréfi eiginkonu sinnar og öðrum persónuskilríkjum og hélt svo af landi brott. Óhætt er að segja að konan hafi upplifað martröð í kjölfarið því hún sat föst í Súdan í samtals 16 mánuði.

Mohamed, sem er 52 ára, neitaði sök í málinu en dómari taldi næg sönnunargögn vera fyrir hendi til að sakfella hann.

Var brot mannsins talið varða við ákvæði laga þar sem fjallað er um mansal enda neyddi hann í raun konuna til að sitja föst í öðru landi. Mun þetta vera í fyrsta sinn sem einstaklingur er sakfelldur fyrir mansal af þessu tagi í Ástralíu.

Dómari í málinu var ómyrkur í máli og sagði að maðurinn hefði komið fram við eiginkonu sína eins og „eign“ sem hann gæti auðveldlega losað sig við.