Áströlsk kona á fimmtugsaldri lést í hræðilegu en jafn framt undarlegu bílslysi þegar hún keyrði fyrir aftan stóran vörubíl nálægt borginni Melbourne í gær. Bílarnir skullu ekki saman heldur féll málmhlutur af vörubílnum í gegnum bílrúðuna hjá konunni sem lést samstundis. Leitað er að ökumanni vörubílsins.
Ástralska blaðið The Herald Sun greinir frá þessu. Konan hét Mary-Anne Cutajar og var 46 ára gömul, fjögurra barna móðir frá bænum Deer Park. Hún var að keyra eftir M80 þjóðveginum nærri Altona um klukkan 16:00 á fimmtudag þegar slysið gerðist.
Samkvæmt lögreglunni er talið að hún hafi keyrt á eftir stórum hvítum vörubíl. Af þessum vörubíl hafi fallið stórt og þungt málmverkfæri (Riv-Nail Driver System), sem sérstaklega er notað til að laga færibönd í námugreftri eða matvælaframleiðslu. Verkfærið hafi fallið í götuna og skoppað af henni og endað framan á bíl Cutajar, mölvað framrúðuna og skollið á henni sjálfri.
„Við erum öll í áfalli, við skiljum ekki hvernig þetta gat gerst,“ sagði einn fjölskyldumeðlimur Cutajar.
Ökumaður vörubílsins stöðvaði ekki heldur hélt áfram í áttina að Altona. Ekki er vitað um ferðir hans eftir það. Ekki er vitað hvort að ökumaðurinn hafi yfir höfuð tekið eftir því að hluturinn hafi dottið af bílnum og valdið slysinu.
Veginum var lokað að meðan rannsókn stóð yfir. Hefur lögreglan í Victoria fylki auglýst eftir að ökumaðurinn gefi sig fram við lögreglu sem og allir sem kynnu að búa yfir einhverjum upplýsingum um slysið. Einnig ef einhver myndi finna myndefni úr bíl sínum sem gæti varpað ljósi á málið.
„Þetta er hræðilegt mál,“ sagði Craig McEvoy, umferðarslysarannsóknarmaður hjá lögreglunni í Victoria. „Þau eru núna að syrgja móður sína og eiginkonu og eru að reyna að aðstoða okkur eftir því sem þau geta í þessum verulega sorglegu aðstæðum.“
Þá beindi hann einnig orðum sínum til allra vörubílstjóra sem keyrðu eftir veginum þennan umrædda dag.
„Ef þú hefur komist að því eftir að leita í vörum bílsins að þú saknir þessa tiltekna verkfæris… þá skaltu gefa þig fram við lögreglu svo við getum rannsakað málið,“ sagði hann.
Annar lögreglumaður, varðstjóri að nafni Amos, nefndi mikilvægi þess að bílstjórar vörubíla tryggðu að allt í bílum þeirra væri fast.
„Við verðum að finna einhver svör fyrir fjölskyldu konunnar því þetta er virkilega sorgleg atburðarás við við viljum vita af hverju þetta gerðist til þess að geta gefið fjölskyldunni, sem verða einum færri þessi jól, svör,“ sagði Amos. „Við þurfum að passa okkur betur. Ef þú ert með varning á vörubíl eða sendibíl þá skaltu festa hann vel. Ef þú sérð brak á götunni, tilkynntu það. Við verðum að sýna ábyrgð á vegunum. Því miður þá held ég að ég muni fást við svona vandamál út lífið.“
