Eldur kom upp í íbúð í efri byggðum Kópavogs í nótt og tókst fjögurra manna fjölskyldu að koma koma sér út. Að sögn Slökkviliðsins á höfuðborgarsvæðinu gekk greiðlega að slökkva eldinn og reykræsta en fjölskyldan var flutt á bráðamóttöku til skoðunar.

RÚV greinir frá því og hefur eftir varðstjóra að fjölskyldumeðlimir séu ekki taldir alvarlega meiddir. Fjölskyldan mun hafa komist út af eigin rammleik og var talsverður eldur í íbúðinni þegar slökkvilið bar að garði.

Sex íbúðir eru í húsinu og þurftu að yfirgefa það meðan á slökkvistarfi stóð. Allir fengu að snúa til baka þegar slökkvistarfi lauk. Eldsupptök eru ókunn að svo stöddu.