Nýlega var auglýst að opnar prufur fari fram í Bretlandi í leit að leikurum í þessi hlutverk. Leitað er að börnum á aldrinum 9 til 11 ára og verða þau að vera búsett annað hvort í Bretlandi eða á Írlandi. Tökur hefjast síðan í apríl á næsta ári.
Stefnt er að því að gera sjö þáttaraðir og mun hver þeirra fjalla um eina bók. Er reiknað með að það muni taka um áratug að ljúka gerð þáttanna. Leikararnir munu því þurfa að helga sig löngu og tímafreku verkefni.
David Zaslav, forstjóri HBO, segir að stefnt sé að frumsýningu fyrstu þáttaraðarinnar á HBO 2026.
Margir aðdáendur Harry Potter vonast til að einhverjir af leikurunum úr kvikmyndunum um galdrastrákinn komi fram í þáttunum en tíminn mun leiða í ljós hvort svo verði.
Daniel Radcliffe, sem lék Harry Potter í kvikmyndunum, lýsti því yfir í júlí 2023 að hann sé hlynntur gerð þáttanna en játaði um leið að hann finni ekki neina sérstaka þörf hjá sér til að koma fram í þeim því hann viti að framleiðendurnir vilji byrja frá grunni og setja sitt eigið mark á þættina.
Channing Dungey, stjórnarformaður og forstjóri Warner Bros, segir að í þáttunum verði farið dýpra ofan í sögurnar um Potter en gert var í kvikmyndunum því meiri tími sé til ráðstöfunar. Hann segist vona að þættirnir verði sögunum trúir og innihaldi efni sem ekki var hægt að hafa með í kvikmyndunum.
