Þór Saari fyrrverandi alþingismaður greinir frá því á Facebook að hann muni ekki taka sæti á lista Sósíalistaflokksins í alþingiskosningunum 30. nóvember eins og hugur hans hafi staðið til. Hann segist hafa sóst eftir 1. sæti á lista flokksins í Suðvesturkjördæmi en áhugi uppstillingarnefndar flokksins á því hafi verið lítill. Segir Þór að í ljósi þess að hann sé sá eini innan flokksins sem hafi einhverja reynslu af þingstörfum sé það sóun á hans þekkingu að hafa hann ekki í oddvitasæti. Þór ætlar sér þó að styðja flokkinn áfram.
Þór var þingmaður fyrir Borgarahreyfinguna og síðan Hreyfinguna frá 2009-2013.
Hann segir í færslu sinni að hann hafi verið á framboðslista í Suðvesturkjördæmi í öllum kosningum síðan 2009 og eins og áður segir sóttist hann í þetta sinn eftir fyrsta sætinu hjá Sósíalistaflokknum:
„Taldi ég að reynsla mín af stjórnmálum og þekking á þingstörfum og starfsemi Alþingis og erindi mitt í stjórnmál almennt síðan ég byrjaði að baksa á þeim vettvangi nytu sannmælis við val á lista flokksins. Svo reyndist ekki vera.“
Hann segir uppstillingarnefnd flokksins ekki meta hann að verðleikum:
„Uppstillinganefnd Sósíalistaflokksins hefur ákveðið að yfirgripsmikil reynsla og þekking á stjórnmálum, auk ritunar bókar um Alþingi, sem og fimmtán ára erindi á vettvangi stjórnmálaumræðu og þátttöku sé einhvers konar aukaatriði sem skipti ekki máli við val á lista flokksins. Þess skal líka getið að undirritaður er sá eini innan Sósíalistaflokksins sem hef reynslu af þingstörfum og starfseminni á Alþingi og þeim frumskógi sem þarf að læra að rata um, komist menn þar að.“
Þór bætir því við að það sé flókið að vera þingmaður og flokkurinn sé þess vegna að sóa reynslu hans og þekkingu með því að hafna honum sem oddvita:
„Það að vera alþingismaður er flókið starf og fyrir nýjan þingflokk tekur það um tvö ár að komast almennilega inn í allar þær skráðu og óskráðu sem gilda þar á bæ vilji menn setja sig almennilega inn í starfið, ár sem þar með nýtast ekki almennilega til að koma málefnum flokksins almennilega á framfæri.Hér er flokkurinn því að sóa bæði þekkingu, reynslu, sem og tíma, sem allt gæti nýst flokknum vel við að koma málefnum sínum á framfæri, komist hann að á Alþingi. Það er leitt að sjá slík vinnubrögð í flokki þar sem vinnan hingað til hefur oftast verið á málefnalegum og röklegum forsendum.“
Þór ætlar þó ekki að snúa bakinu við flokknum og segir hann eina góða valkostinn í kosningunum:
„Ég mun að sjálfsögðu halda áfram stuðningi við Sósíalistaflokkinn, enda eini flokkurinn sem á raunverulegt erindi inn á þing, ef tekið er mið af þeim hagsmunum sem almenningur almennt hefur. Sósíalistaflokkurinn mun vonandi ná meira flugi og komast að á „Stóra sviðinu“ í komandi kosningum og geta komið því betur til skila til almennings hversu mikilvægt erindi flokkurinn á í landsmálin, og þá sem leiðandi afl sem hefur kjark, þor og visku til að láta almennilega til sín taka.“
