Nú eru norðurkóreskir hermenn komnir til Rússlands og Úkraínu til að berjast með rússneskum hermönnum gegn Úkraínumönnum. Er talið að í þessari fyrstu lotu sendi Norður-Kórea 15.000 hermenn. Úkraínumenn ætla meðal annars að bregðast við þessu með því að reyna að fá Kóreumennina til að gerast liðhlaupar. Þeir lofa þeim þremur heitum máltíðum á dag og læknisaðstoð í staðinn.

„Gefstu upp! Úkraína mun vernda þig og sjá þér fyrir mat og hita,“ segir í úkraínskri herferð sem er beint að norðurkóresku hermönnunum.

Þessum boðskap er deilt á samfélagsmiðlum af „Ég vil lifa verkefninu“ sem var sett á laggirnar til að annast rússneska hermenn sem gerast liðhlaupar.

Það eru svo sem litlar líkur á að norðurkóresku hermennirnir hafi aðgang að samfélagsmiðlum á borð við X en samt sem áður er auglýsingin birt þar á kóresku. Í henni segir að mörg þúsund rússneskir hermenn hafi nú þegar tekið réttu ákvörðunina og gerst liðhlaupar. Þeir bíði þess nú að stríðinu ljúki og dvelji í hlýjum húsakynnum, fái þrjár heitar máltíðir á dag og heilbrigðisþjónustu.