Erlendur maður á fertugsaldri hefur verið dæmdur fyrir að sparka í punginn á lögreglumanni í Reykjanesbæ. Mætti hann ekki fyrir dóm og var dæmdur að honum fjarstöddum.

Dómurinn féll í Héraðsdómi Reykjavíkur þann 10. október síðastliðinn og var birtur í Lögbirtingablaðinu í dag. Þar er atvikum líst sem gerðust aðfaranótt laugardagsins 5. ágúst árið 2023.

Hafði hinn erlendi maður verið færður í lögreglubíl og verið var að aka frá Hafnargötu í Keflavík að lögreglustöðinni við Hringbraut. Sparkaði hann þá í klofsvæði lögreglumanns sem var við skyldustörf með þeim afleiðingum að hann hlaut eymsli neðst í kvið hægra megin og eymsli og bólgu í kvið og nára hægra megin niður í pung.

Var hann ákærður fyrir brot gegn valdstjórninni og krafist að hann yrði dæmdur til refsingar og greiðslu alls sakarkostnaðar.

Mætti maðurinn ekki fyrir dóm og hafði ekki heldur boðað forföll. En bæði ákæra og fyrirkall var birt með lögmætum hætti. Var málið því dæmt að honum fjarstöddum og hann dæmdur í 60 daga skilorðsbundið fangelsi til tveggja ára.