Hannes Hólmsteinn Gissurarson, prófessor emiritus í stjórnmálafræði við Háskóla Íslands, hefur verið valinn einn af 400 merkustu félögum sögunnar í Pembroke College í Oxford.

Frá þessu greinir Morgunblaðið í dag en tilefni valsins er 400 ára afmæli Pembroke College sem var stofnaður árið 1624.

Óhætt er að segja að Hannes sé í góðum félagsskap á listanum því þar er einnig að finna rithöfundinn J.R.R. Tolkien, höfund Hringadróttinssögu, bandaríska öldungadeildarþingmanninn J. William Fulbright, breska stjórnmálamanninn Michael Heseltine lávarð og samgöngumálaráðherra Bandaríkjanna, Pete Buttigieg.

Hannes ræðir þetta í samtali við Morgunblaðið þar sem hann segir meðal annars:

„Þetta kom mér algjörlega á óvart. Ég fékk tilkynningu frá Pembroke um þetta. En ég á ekki nema góðar minningar frá Oxford, þar sem ég var árin 1981 – 1985,“ segir hann meðal annars.

„Þar var spurt hvaða rök­semd­ir og gögn menn gátu lagt fram en ekki hverra manna þeir væru eða í hvaða klíku. Á mín­um náms­ár­um í Oxford var þetta kyrr­lát­ur griðastaður fyr­ir grúsk og rann­sókn­ir, fjarri skarkala heims­ins, en samt í góðum tengsl­um við hann, enda ekki nema klukku­tíma ferð í lest til Lund­úna.“

Í umfjöllun Morgunblaðsins er vísað í umsögn um Hannes á heimasíðu Pembroke College og er þess getið að hann hafi verið R.G. Collingwood Scholar á Pembroke og tvö ár og stofnað Hayek Society í Oxford. Þá sé hann kunnur álitsgjafi og málsvari hins frjálsa markaðar.