Þetta segir leiðarahöfundur Morgunblaðsins í dag um afhjúpandi skilaboð sem Kristrún Frostadóttir, formaður Samfylkingarinnar, sendi kjósanda á dögunum. Fjallað var um skilaboðin um helgina en kjósandinn lýsti yfir áhuga á að kjósa Samfylkinguna en kvaðst þó óánægður með að Dagur B. Eggertsson, fyrrverandi borgarstjóri, væri á lista í Reykjavík norður á eftir henni.
Í svari til kjósandans gerði Kristrún sem minnst úr væntanlegu hlutverki Dags, lagði áherslu á að hann yrði ekki ráðherra og benti kjósandanum á að hann gæti kosið Samfylkinguna en strikað yfir nafn Dags. Kristrún bætti því við að það væri hún sem stjórnaði í Samfylkingunni en ekki Dagur.
Uppnám eftir afhjúpandi skilaboð Kristrúnar til kjósanda – „Þetta er ógeðsleg framkoma“
Í leiðara blaðsins segir höfundur að Dagur hafi þurft að bíða lengi eftir svari frá Kristrúnu um það hvort hann fengi yfirleitt sæti á lista flokksins.
„Þegar svarið kom þá var annað sætið í öðru Reykjavíkurkjördæminu í boði, alls ekki oddvitasæti. Þetta er sérstaklega áhugavert í ljósi þess að formaðurinn sagði einnig að fyrst og fremst yrði horft til oddvitanna við val á ráðherrum flokksins, komi til þess, Dagur sé hins vegar „að stíga til baka“,“ segir leiðarahöfundur og vindur sér síðan að einkaskilaboðunum sem birtust um helgina þar sem talað sé enn skýrar.
„Óhætt er að segja að ekki hafi maður áður verið niðurlægður með slíkum hætti við val á lista og verður að teljast með ólíkindum að honum sé boðið sætið, hvað þá að hann þiggi það. Hann skal sitja og standa eins og formaðurinn segir, hann er „aukaleikari“, eins og formaðurinn orðar það og í „stuðningshlutverki“. Þá bendir hún kjósanda í einkaskilaboðum á að sé viðkomandi ósáttur við að hafa Dag á listanum þá liggi „beinast við að strika hann út“. Og til að tryggja rækilega að enginn efi sé til staðar um álit formannsins á borgarstjóranum fyrrverandi tekur Kristrún fram að hún skilji „vel sjónarmið fólks sem vill ekki hafa hann“ og að staða Dags á listanum þýði ekki að „ég sé samþykk öllu sem borgin hefur gert“.“
Leiðarahöfundur Morgunblaðsins segir að þetta sé allt með miklum ólíkindum og útilokað sé að engin eftirmál verði, þó að eflaust verði „reynt að setja lokið á“ fram yfir kosningar.
„Það gengur vitaskuld ekki upp að halda því fram að fyrrverandi borgarstjóri til margra ára geti ekki orðið ráðherra því að hann sé á Alþingi kominn á nýjan vettvang og þurfi að læra að fóta sig. Hvað þá með Ölmu Möller og Víði Reynisson? Hvaða yfirburðareynslu hafa þau sem fyrrverandi borgarstjóri hefur ekki? Eða Jóhann Páll Jóhannsson, sem setið hefur á þingi í þrjú ár en hafði fram að því ekki teljandi reynslu.“
Segir leiðarahöfundur að auðvitað sé það fyrirsláttur að fyrrverandi borgarstjóra skorti reynslu eða þekkingu til að vera gjaldgengur sem ráðherraefni. Augljóst sé að eitthvað annað búi að baki.
„En hvað er það þá sem veldur þessari sérkennilegu framkomu formannsins við flokksfélaga sinn? Augljósa skýringin hlýtur að vera sú að formaðurinn veit, þó að borgarstjórinn fyrrverandi og flokkurinn viðurkenni það ekki, að undir forystu Samfylkingarinnar hefur Reykjavík verið illa stjórnað, þjónustan við íbúana er afleit, skipulagsmálin í ólestri og fjármálin þannig að í algert óefni er komið,“ segir í leiðaranum sem endar á þessum orðum:
„Þessu vill formaðurinn ekki gangast við og treystir sér því ekki til að segja nei við framboði Dags, en vill draga úr skaða þess fyrir flokkinn. Um leið vonast Kristrún líklega til þess að Dagur verði gagnlegur við að mynda stjórn í anda Reykjavíkurmódels Samfylkingarinnar, með Pírötum, Viðreisn og eftir atvikum Framsókn eða Vinstri-grænum, nái sá flokkur þrátt fyrir allt á þing. Dagur segir sjálfur í framboðsyfirlýsingu sinni að Sjálfstæðisflokkurinn þurfi frí, og miðað við orð formannsins um að hann dansi að hennar vilja eru þau skilaboð væntanlega frá henni komin.“
