Í dag, sunnudag, fór fram lokaumferð í Bestu deild karla þar sem Breiðablik tók á móti Íslandsmeistaratitlinum eftir sigur á Víkingi R.
Eins og undanfarin ár velja leikmenn í Bestu deildinni besta og efnilegasta leikmann deildarinnar ásamt því að velja besta dómarann.
Efnilegasti leikmaður Bestu deildar karla 2024 er Benoný Breki Andrésson, KR. Benoný Breki skoraði 21 mark í 26 leikjum, þar á meðal skoraði hann 5 mörk í lokaumferðinni og bætti þar með markamet í efstu deild.
Besti leikmaður Bestu deildar karla 2024 er Höskuldur Gunnlaugsson, Breiðablik. Höskuldur spilaði 27 leiki fyrir Blika og skoraði í þeim 9 mörk.
Það hefur verið fastur liður í lok móta síðan 1984 að afhenda leikmönnum sem skara fram úr í efstu deild karla „Flugleiðahornin“. Fyrst þegar þessir frægu verðlaunagripir voru afhentir þá var Guðni Bergsson leikmaður Vals valinn efnilegasti leikmaðurinn og Bjarni Sigurðsson leikmaður ÍA valinn besti leikmaður deildarinnar.