Nítján ára kona sem starfaði fyrir verslunarrisann Walmart í Kanada fannst látinn í ofni verslunarinnar á laugardaginn. Um er að ræða ofn sem bakarí verslunarinnar nota og er hann manngengur. Talið er að stúlkan hafi óvart læst sig inn í ofninum sem svo hafi farið í gangi. Stúlkan hefur nú verið nafngreind og eins er komið í ljós að það var móðir hennar sem kom að henni látinni. 

Stúlkan hét Gursimran Kaur og hafði flutt með móður sinni frá Indlandi til Kanada fyrir tveimur árum síðan. Mæðgurnar unnu svo saman í Walmart. Nú er hafin söfnun á GoFundMe til að styðja fjölskylduna í gegnum þennan harmleik en það var móðir Gursimran sem kom að henni látinni. Hún fór að leita að dóttur sinni eftir að ekki hafði sést til hennar í um klukkustund.

Upptaka af símtali til neyðarlínunnar hefur nú verið opinberuð. Þar var viðbragðsaðilum tilkynnt að kona væri læst inni í ofni verslunarinnar og engin leið væri að slökkva á ofninum. Gripu starfsmenn loks á það ráð að taka rafmagnið af ofninum og tókst þá að koma Gusimran út en það var um seinan. Gursimran var úrskurðuð látin á vettvangi.

Samkvæmt GoFundMe síðunni er móðir stúlkunnar í molum enda varla hægt að ímynda sér sorgina sem fylgir því að koma að dóttur sinni látinni í aðstæðum sem þessum.