Jón er í viðtali í nýjasta tölublaði Heimildarinnar en Geir Örn hefði orðið 18 ára þann 8. nóvember næstkomandi.
Í viðtalinu kemur fram að Jón hafi ekki einu sinni vitað að drengurinn hans væri vistaður á Stuðlum. Hafði hann verið þar í innan við klukkustund þegar eldurinn braust út og fékk hann símtal frá barnavernd snemma morguns þar sem honum var tjáð að alvarlegt atvik hefði orðið.
„Ég spyr: Af hverju ertu að hringja í mig? Geiri er ekki þar. Ég er pabbi hans og vissi ekki að hann væri á Stuðlum,“ segir hann í viðtalinu.
Í viðtalinu segist Jón vilja stíga fram til að opna umræðuna um „týndu börnin í kerfinu“ eins og hann orðar það. Hann hafi barist fyrir lífi sonar síns í áratug í kerfinu en nú berjist hann við kerfið í minningu sonar síns. Hann gagnrýnir úrræðaleysi í málefnum barna sem glíma við fíkn.
„Sama hvert ég leitaði þá var enga hjálp að fá. Það er enga hjálp að fá fyrir þessa krakka í þessu samfélagi okkar.“
Í viðtalinu í Heimildinni fer Jón yfir sögu sonar síns og nefnir einnig að hann hafi átt fund með Ásmundi Einari Daðasyni barnamálaráðherra í vikunni þar sem hann talaði um eldsvoðann á Stuðlum.